Arhıvterden 1 mln-nan astam qujat zertteýge berilgen

ASTANA. QazAqparat – Mádenıet jáne sport vıtse-mınıstri Nurǵısa Dáýeshov arhıv salasyndaǵy jumystarǵa qatysty túsinik berdi, dep habarlaıdy QazAqparat tilshisi.

Onyń aıtýynsha, memlekettik arhıvterde saqtalatyn qujattardyń sany 25 mln-nan asty. Jyl saıyn arhıvter orta eseppen 400 myńǵa deıin qujatpen tolyǵady.

«Respýblıkanyń memlekettik arhıvteri osy qujattardyń turaqty saqtalýyn, olardyń paıdalanylýyn qamtamasyz etedi. Jylyna júz myńdaǵan otandasymyz memlekettik arhıvterdiń qyzmetine júginedi. 2022 jyly 458 957 zańdy jáne jeke tulǵalardyń suranystary oryndaldy. Oqý zaldary arqyly zertteýshilerge 1 mln-nan astam qujat berildi», - dedi N. Dáýeshev mınıstrliktiń alqa májilisinde.

Onyń sózine qaraǵanda, arhıv salasyn qarjylandyrýdy ulǵaıtýdyń arqasynda keıingi eki jylda qujattardy tsıfrlandyrý qoryn qurý úshin 1000-nan astam jańa tehnıka alyndy. Bul qadamdar qujattardy tsıfrlandyrýdy jedeldetýge múmkindik berdi. Byltyr tsıfrlandyrylǵan qujattardyń kólemi 3,7-den 6 paıyzǵa deıin artty. Jalpy, 1 mln 300 myńnan astam qujat tsıfrlandyryldy, bul qujattar 317 mln paraqty quraıdy.

«Arhıv – 2025» jobasy aıasynda respýblıkalyq arhıvterdiń ǵylymı ekspedıtsııalary 2022 jyly 14 shet elde tıisti zertteý júrgizdi.

Budan buryn habarlanǵandaı, byltyr Qazaqstan tarıhyna qatysty 7 myńnan astam qujat elge ákelingen.

Elimizde 20-ǵa jýyq memlekettik arhıv ǵımaratyn salý kerek.