Arhıv isi kez kelgen memleket úshin strategııalyq turǵydan óte mańyzdy — Balaeva

ASTANA. KAZINFORM — Búgin el tarıhyn saqtap, keıingi urpaqqa mura etip qaldyrýǵa zor úles qosyp júrgen arhıv qyzmetkerleriniń kásibı merekesi. Premer-mınıstrdiń orynbasary – Mádenıet jáne aqparat mınıstri Aıda Balaeva arhıv qyzmetkerlerin kásibı merekesimen quttyqtady. 

— Arhıv isi kez kelgen memleket úshin strategııalyq turǵydan óte mańyzdy. Aqparattyq tehnologııalar qarqyndy damyp jatqan qazirgi ýaqytta arhıv derekkózderi ulttyq resýrstardyń mańyzdy bóligine aınalyp, ulttyq biregeılikti qalyptastyrýda, patrıottyq qundylyqtardy ornyqtyrýda, eńbekke qurmet pen urpaqtar sabaqtastyǵyn nyǵaıtýda sheshýshi ról atqaryp otyr.

Qazaqstannyń qalyptasý jáne serpindi damý joly, Táýelsizdik jyldaryndaǵy ekonomıka, ǵylym, mádenıet, sport jáne ózge de salalardaǵy jetistikter memlekettik arhıvter qorynda keńinen kórinis tapqan, — dedi Premer-mınıstrdiń orynbasary — Mádenıet jáne aqparat mınıstri Aıda Balaeva.

Búginde elimizde 236 memlekettik arhıv jumys isteıdi.

— Onda jalpy kólemi 27,8 mıllıon saqtaý birligin quraıtyn 74 725 arhıv qory saqtaýly. 3 mıllıonnan astam is elektrondyq formatqa kóshirilip, azamattardyń arhıv materıaldaryna qoljetimdiligin edáýir arttyrdy. Tarıhı-mádenı mura sanalatyn bul qujattar Qazaqstanda ǵana emes, sheteldik ǵylymı qaýymdastyq arasynda da úlken suranysqa ıe.

Arhıv salasy jan-jaqty damyp keledi. Bıyl Memleket basshysynyń IV Ulttyq quryltaıda bergen tapsyrmasyn oryndaý maqsatynda Mádenıet jáne aqparat mınıstrligi arhıv, mýzeı jáne kitaphanalardyń qujattyq materıaldaryn biriktirýdi kózdeıtin «Ulttyq tsıfrlyq arhıv» portalyn iske qosý jónindegi jol kartasyn bekitti, — dedi Balaeva.

Qazaqstannyń Ulttyq arhıv qory biregeı derekkózdermen júıeli túrde tolyǵyp keledi. «Arhıv — 2025» jobasy aıasynda Germanııa, Polsha, Frantsııa, Túrkııa, Úndistan, Iran, Egıpet jáne Ortalyq Azııa memleketterin qosa alǵanda, 14 eldiń arhıvinde, kitaphanalarynda jáne ǵylymı mekemelerinde zertteý jumystary júrgizildi. Nátıjesinde Qazaqstan tarıhyna qatysty 7 myńnan astam qundy qujat jınalyp, olar kezeń-kezeńimen ǵylymı aınalymǵa engizilip jatyr.

Qazirgi arhıv qyzmetkeri — joǵary zııatkerlik áleýetke ıe, qujattanýshy-sarapshy, zertteýshi, IT-maman, restavrator jáne analıtık quzyretterin úılestirgen ámbebap kásibı maman.

— Arhıv salasy qyzmetkerleriniń eńbegi laıyqty baǵalanyp keledi. 2025 jyly Memleket basshysynyń Jarlyǵymen úsh arhıv qyzmetkeri «Qurmet» ordenimen, ekeýi «Eńbek ardageri» medalimen, bireýi «Qazaqstan Respýblıkasy Konstıtýtsııasyna 30 jyl» mereıtoılyq medalimen marapattaldy. Sondaı-aq sala boıynsha 197 qyzmetker men ardager vedomstvolyq nagradalar aldy, onyń ishinde 64 adam «Arhıv salasynyń úzdigi» tósbelgisimen marapattaldy.

Memleket tarapynan arhıv qyzmetkerlerin qoldaýǵa baǵyttalǵan júıeli sharalar qabyldanyp jatyr. Bıyl 265 maman biliktiligin arttyrý kýrsynan ótip, arhıv salasy qyzmetkerleriniń ortasha jalaqysy 29 paıyz ósti. Arhıv isin damytýǵa, arhıv qoryn tolyqtyrýǵa jáne qundy murany ǵylymı aınalymǵa engizýge qosqan ólsheýsiz úlesterińiz úshin shynaıy alǵysymdy bildiremin. Sizderge zor densaýlyq, otbasylaryńyzǵa amandyq jáne el ıgiligi jolyndaǵy qyzmetterińizge tolaıym tabys tileımin. Kásibı merekelerińiz qutty bolsyn, — dedi Aıda Balaeva.

Aıta ketelik arhıv qyzmetkerleriniń jalaqysy ósetini týraly jazǵan edik.