Arhıv qujattarynyń 98 paıyzy órtten qorǵalmaǵan ǵımarattarda saqtaýly tur

ASTANA. QazAqparat – Óńirlerde memlekettik arhıv ǵımaratyn salýǵa jáne qoldanysta bar nysandardy jóndeýge ákimdikter qarjy bóle almaıdy. Mádenıet jáne sport mınıstrligi jarııalaǵan retteýshilik saıasattyń konsýltatıvtik qujatynda osyndaı másele kóterilgen, dep habarlaıdy QazAqparat tilshisi.

«Memlekettik arhıvterdiń 97,8% qujattardyń saqtalýyn, órt qaýipsizdigin qamtamasyz etý jáne múmkindigi shekteýli adamdarǵa jaǵdaı jasaý bóliginde zańnama talaptaryna saı kelmeıtin ǵımarattarda ornalasqan. Bul keıingi urpaq úshin eldiń mol murasyn joǵaltý qaýpin týǵyzady», - delilgen qujatta.

Mınıstrlik máseleniń sebebi retinde jergilikti atqarýshy organdar quzyretiń jetpeı otyrǵanyn kórsetken.

«Búgingi tańda respýblıkalyq bıýdjetten óńirlerde mádenıet obektilerin salýǵa transfert arqyly qarajat bólinedi. Alaıda, jergilikti atqarýshy organdardyń salalyq zańda tıisti quzyreti joqtyǵyna baılanysty ony memlekettik arhıv ǵımaratyn salýǵa jáne rekonstrýktsııalaýǵa jumsaýǵa múmkindigi joq», - dep jazylǵan kosýltatıvtik qujatta.

Vedomstvo deregine saı, 2000-2018 jyldar aralyǵynda QR Ulttyq arhıvi, Almaty, Shymkent qalalary men Almaty jáne Qyzylorda oblystarynyń arhıvteri zamanýı jabdyqtarmen qamtylǵan.

Sonymen qatar, osy aralyqta barlyǵy 5 muraǵat nysany paıdalanýǵa berildi.

Aqtóbe, Batys Qazaqstan oblystaryndaǵy oblystyq arhıvterdiń negizgi ǵımaraty keńeıtilgen.

Degenmen bul jumys jetkilikti kólemde qujat saqtaýǵa múmkindik bermeı otyr. Atap aıtqanda, elimizdegi 13 oblystyń memlekettik arhıvteri 100% tolǵan.