«Arhıv-2025»: Mádenıet mınıstrligi joba tujyrymdamasyn ázirlep jatyr
«Qazir atalǵan joba boıynsha baǵdarlamanyń tujyrymdamasyn ázirleý ústindemiz. Eń aldymen memleket basshysy aıtqandaı, ǵylymı aınalymǵa túspeı jatqan babalarymyzdyń ómiri men olardyń ǵajap órkenıeti jónindegi kóptegen derekti qujattardy zertteý úshin, biryńǵaı jumys toby qurylady. Bul jumys toby aldaǵy ýaqytta atqaratyn is-sharalardy josparlaıdy. Іske asyrylatyn zertteý jumystaryn bir arnaǵa toǵystyrý úshin «E-arhıv» - elektrondy qujattardyń biryńǵaı arhıvi jasalatyn bolady. Onda elektrondy portal qurylady. Jalpy Qazaqstan boıynsha 219 memlekettik arhıv bar. Solardyń barlyǵy «E-arhıv»-ke qosylady», - dedi Anýar Toqtarov.
«E-arhıv» jobasy 2018-2020 jyldar aralyǵyn qamtıdy. Buǵan 1,5 mlrd teńge qarastyrylǵan. Jobanyń prototıpi daıyndalyp, arhıv qyzmetkerlerine tanystyryldy. Endi tek arhıvterdi atalǵan jobany iske asyrýǵa qajetti zamanaýı uıymdastyrý quraldarymen qamtamasyz etý, basqasha aıtqanda materıaldyq-tehnıkalyq turǵydan qaıta jasaqtaý qaldy.
2020 jylǵa deıin arhıvter 100% joǵaryda atalǵan elektrondy portalǵa qosylýy tıis. Mamandar Memleket basshysynyń maqalasynan soń bul jobany keńeıtýge kúsh salmaq.
Anýar Toqtarovtyń aıtýynsha, portalda Qazaqstan týraly zertteý jumystarynyń elektrondy foto, aýdıo, vıdeo, skan qujattarynyń tsıfrlandyrylǵan nusqalary jarııalanady.
«Keıbir qujattardyń ózin ákele almaımyz. Biraq kóshirmelerin ákelip, skan nusqalaryn qoıamyz. Kez kelgen arhıv qyzmetkeri ony tsıfrlyq formatta ashyp kóre alady. Alaıda, kez kelgen arhıv bul jobaǵa dál qazir qosyla almaıdy. Tıisti bilimi bar mamandar da qajet. Osy máseleniń barlyǵyn jumys toby sheshedi», - dedi ol.
Aıta ketý kerek, Elbasy «Uly dalanyń jeti qyry» maqalasynda «Arhıv-2025» jeti jyldyq baǵdarlamasyn jasaý týraly usynys aıtqan bolatyn.