«Arhıv-2025» aıasynda 30 myń qujattyń kóshirmesin ákelýdi kózdep otyrmyz - Berik Ábdiǵalı
«Elbasynyń «Uly dalanyń jeti qyry» maqalasy aıasynda bastalǵan «Arhıv-2025» baǵdarlamasyna qysqasha toqtalyp óteıin. Jaqynda ǵana Mádenıet jáne sport mınıstrliginiń tapsyrmasy boıynsha Ulttyq arhıv pen qoljazbalar, sırek kitaptar ulttyq ortalyǵynyń janynan «Arhıv-2025» ǵylymı-ádistemelik ortalyǵy quryldy. Arnaıy respýblıkalyq jumys toby qurylyp, oǵan barlyq ortalyq jáne óńirlik arhıv jetekshileri, oblystyq arhıv basshylary kirdi. Búgingi tańda «Arhıv-2025» memlekettik baǵdarlamasynyń jobasyn daıyndaý kózdelip otyr. Sonymen qatar, arhıvterdiń shetelden qaıtarylǵan nemese anyqtalyp, qaıtarylmaǵan qujattardyń tolyq saraptamasyn jasap, arnaıy shetel arhıvteri men kitaphanalaryna shyǵatyn respýblıkalyq arheografııayq ekspedıtsııasyn jasaý josparlanýda», - dedi Berik Ábdiǵalı Astanada ótip jatqan QR Mádenıet jáne sport mınıstrliginiń keńeıtilgen alqa májilisinde.
«Qasıetti Qazaqstan» ǵylymı-zertteý ortalyǵy jetekshisiniń aıtýyna qaraǵanda, bıyldan bastap bıýjettik komıssııa boıynsha qarajat bólinse, búkil álemdegi qazaqtyń tarıhyna qatysty qujattar túgendeledi.
«Bul baǵdarlamada biz BǴM-nyń tarıh, shyǵystaný ınstıtýttarymen, ǵalymdarmen birigip jumys isteımiz. Búgingi kúni «Mádenı mura», «Tarıh tolqyny» baǵdarlamalarynyń arqasynda 36 635 qujat anyqtalǵan eken. Biraq, onyń 6 400-iniń ǵana kóshirmesi kelgen. Sol sebepti, birinshi kezekte ǵalymdarymyz anyqtaǵan, alaıda elge ákelinbegen qujattardy ákelý josparlanyp otyr. Bul da bizdiń tarıh ǵylymynyń damýyna, tarıhty túgendeýde jaqsy qadam bolmaq», - dedi ol.
Berik Ábdiǵalı jastardy tarıhı qujattarmen jumys isteýge úırete otyryp, jastardyń tarıh ǵylymyna qyzyǵýshylyǵyn arttyrý baǵytynda jaqsy múmkindik týyp otyrǵanyn atap ótti.
«Bizde qytaı nemese arab tilin biletin mamandar jetkiliksiz. Maman daıyndap, arhıvterge mamandarymyzdy taǵylymdamaǵa jibersek, kóptegen qujattardy ákelemiz degen senimdemiz. Tarıhymyzdy túgendeý baǵytyndaǵy jumystarymyz baıandy bolsyn», - dedi Berik Ábdiǵalı.
