Arhımed Muhambetov: Jumys istemeıtin kooperatıvter sýbsıdııadan shettetilýi tıis
Oblystyq aýyl sharýashylyǵy basqarmasynyń deregine súıensek, byltyrǵy jyly oblysta maldyń sany birshama ósken. Buǵan «Altyn asyq», «Qulan», «Sybaǵa» sekildi baǵdarlamalar yqpalyn tıgizdi.
«Aımaqta 440 myńǵa jýyq asyl tuqymdy iri qara ósirilýde. Ótken kezeńdermen salystyrǵanda ósim 3 paıyzǵa teń. Sondaı-aq, 437 myń qoı-eshki, 107 myńdaı jylqy bar. Byltyr «Sybaǵa» baǵdarlamasy boıynsha Amangeldi, Altynsarın, Denısov, Taran, Jangeldın, Sarykól, Qamysty jáne Meńdiqara aýdandarynda jospar artyǵymen oryndaldy. Degenmen, keıbir aýdandarda bul baǵyttaǵy jumystar óte sylbyr. Tipti, membaǵdarlamalar boıynsha birde bir bas mal satyp alynbaǵan», - dedi Darhan Ábdikárimov.
Oblys ákimi Arhımed Muhambetov iri qara sanyn kóbeıtý úshin keshendi sharalar ázirlenýi kerek ekenin aıtty. Jaýapty tulǵalarǵa osyny qadap tapsyrdy.
«Sharýalar memlekettik baǵdarlamalardyń sheńberinde maldyń sanyn arttyryp otyr. Alaıda, arqany keńge salatyn kez emes. Tólderdiń sanyn tómendetip almaý mańyzdy», - dedi ol.
Byltyr aýyl sharýashylyǵy kopperatıvterin qurýǵa oblys boıynsha 2 mlrd teńge qarjy bólindi. Nátıjesinde 40 aýyl sharýashylyǵy kooperatıvi quryldy. Onyń 18 etti baǵytta, qalǵany sút óndirisi baǵytynda. Nátıjesinde, iri qara sany kóbeıip, ónim óndirý kórsetkishi arta bastady. Alaıda, keıbir kooperatıvterdiń jumysy toqtap tur.
«Atalǵan kooperatıvterdiń jeteýiniń jumysy turalap qalǵan. Atap aıtqanda, «Uzynkól mal ónimderi», «Vektor», «Tanabaı», «Ulpa» sııaqty kooperatıvter birde-bir memlekettik baǵdarlamalarǵa qatysqan emes», - deıdi aýyl sharýashylyǵy basqarmasynyń basshysy.
Arhımed Muhambetovtiń sózinshe, tek qana tirkeýde turǵan osyndaı kooperatıvter memleket tarapynan beriletin sýbsıdııamen qamtylmaýy tıis. Aımaq basshysy bul baǵyttaǵy jumystardy óz baqylaýyna alatynyn jetkizdi.
