Arhımed Muhambetov jetim balalardy baspanamen qamtý jumysyn synǵa aldy
QOSTANAI. QazAqparat - Qostanaı oblysynyń ákimi Arhımed Muhambetov bilim basqarmasynyń jetim balalardy úımen qamtamasyz etý boıynsha atqaryp jatqan jumystaryn synǵa aldy, dep habarlaıdy QazAqparat tilshisi.
Mekemede málim etkendeı, oblysta jetim balalardyń jaǵdaıyn jaqsartý boıynsha júıeli jumys atqarylýda. Sondaı-aq, ata-ana qamqorlyǵynsyz qalǵan balalardyń jalpy sanynyń azaıǵany baıqalady.
«Oblysta jalpy 2296 jetim bala bar. Onyń 67 paıyzy otbasylarda turyp jatyr. 33,5 paıyzy nemese 761 bala 14 balalar úıinde jáne ınternattyq uıymdarda turady. Osylaısha, aýdan men qalanyń 20 bilim bóliminiń esebinde ata-anasyz qalyp, qamqorlyq pen qorǵanshylyqqa berilgen 1359 jetim bala bar. 175 bala - patronattyq tárbıede», - dedi oblystyq bilim basqarmasynyń basshysy Bátıma Daýmova apparattyq keńestiń otyrysynda.
Qostanaı oblysynda sońǵy 7 jyl ishinde jetim jáne ata-ana qamqorlyǵynsyz balalarǵa arnalǵan uıymdar sany 4 birlikke qysqarǵan. 2018 jyldyń ótken merzimi ishinde ǵana atalǵan mekemelerden 94 bala shyǵarylǵan.
«Atqarǵan jumystyń nátıjesi retinde 2017 jyly Fedorov balalar úıi men bıylǵy Qostanaı oblystyq balalar úıiniń jabylýyn keltire alamyz. 5 jyldyń ishinde 366 bala otbasyly bolyp, 778 bala týǵan úıine qaıtaryldy, qazaqstandyq azamattar 320 balany asyrap aldy» - dedi B. Daýmova.
Óńir ákimi Arhımed Muhambetov atalmysh jumystardy oblystyń ózge de aýdandary men oblystarynda jalǵastyrý kerek ekenin erekshe aıtyp ótti.
Oblystyq bilim basqarmasynyń basshysy B. Daýmova Keńes otyrysynda sóz sóıleý kezinde balalar úıinen ketken tárbıelenýshilerdiń aldaǵy taǵdyry, ásirese olardy baspanamen qamtamasyz etý máselesine toqtalmaǵan. Bul máselege qatysty Arhımed Muhambetov eskertý jasady.
«Qostanaıda alǵashqy jartyjyldyqta 35 jetim bala úımen qamtylýy kerek edi. Sizder slaıdta nól dep kórsetipsizder. Astana kúnine oraı berilgen páterlerdi eskerdińizder me? Olardyń qatarynda jetim balalar da bolǵan. Olar nege eleýsiz qaldy? Mekeme qyzmeti tym tómen», - dedi ákim.
Osyǵan baılanysty, Arhımed Muhambetov áleýmettik máseleler jónindegi orynbasary Marat Jandýbaevqa atalmysh másele boıynsha keńes ótkizýdi tapsyrdy.
