Arhımed Muhambetov jerdi tıimsiz paıdalanǵandardy jónge keltirýdi tapsyrdy
QOSTANAI. QazAqparat - Oblystyq jerdiń paıdalanylýy men qorǵalýyn baqylaý basqarmasy ótken jyly jer zańnamasyn buzýǵa qatysty 231 derekti anyqtaǵan. Bul týraly oblys ákimdiginde ótken apparat májilisinde atalǵan basqarmanyń basshysy Nurjan Abdýov málimdedi, dep habarlaıdy QazAqparat.
Inspektorlar tarapynan ákimshilik jazalaý retinde 21,3 mln teńgeniń aıyppuly salynǵan. Tekserý negizinen aýyl sharýashylyq baǵytyna jáne kommertsııalyq nysandarǵa qurylystyń salynbaýyna qatysty júrgizilgen. Nurlan Ábdýov aıtqandaı, óńirde memleket menshigindegi jer telimderin óz betinshe ıemdenip, onyń aýmaǵyn qorshap alǵan kásipkerler kóbeıdi. "Qarasý aýdanynda sharýa qojalyqtary basshylarynyń 3,1 myń sharshy metr jerdi zańsyz ıemdenýine qatysty 4 derek anyqtaldy. Olarǵa 600 myń teńgeden astam aıyppul kóleminde ákimshilik jaza qoldanylyp, óreskeldikti joıý jóninde hat joldandy", - dedi N.Ábdýov.
Ótken jyly basqarma aýyl sharýashylyq maqsatynda ıgerilgen 504,7 myń ga aýmaqty baqylaýǵa alǵan. Onyń 76 myń gektardan astamynda zańsyzdyqtar tirkelgen.
Atap aıtqanda, «Jasa-12» JShS (Taran aýdany), «Tasservıs» JShS (Qostanaı aýdany), «Esjanov Ch.J.» ShQ (Áýlıekól aýdany) sharýashylyqtary 2017-2018 jyldary irili-usaqty mal satyp alyp, qazirgi ýaqytta tólderin zańsyz alynǵan jaıylymda óristetip júr.
Byltyr aýyl sharýashylyǵy maqsatyndaǵy 456 myń gektar aýmaqqa qatysty 28 narazyhat joldanǵan bolsa, memleket menshigine 290 myń ga jýyq jer telimi qaıtaryldy. 130 ga alqapqa qatysty qujattar sot qaraýynda. Bıyl aýyl sharýashylyq baǵytyndaǵy jalpy kólemi 10,7 myń ga bolatyn 11 ýchaskeni sot arqyly qaıtaryp alý josparlanyp otyr.
Aıta keterligi, bul ýchaskelerdiń barlyǵy jeke menshiktiń qaramaǵynda bolǵandyqtan, olardyń qojaıyndary jerdi óz qajettilikterine qaraı paıdalanýda. Máselen, aýyl sharýashylyq maqsatta alynǵan jerlerge qurylys salatyndar kóp. Aımaq basshysy Arhımed Muhambetov jerdiń paıdalanylýy men qorǵalýyn baqylaý basqarmasyna qarasty keıbir aýdandardaǵy bólimderde mamandar jetispeıtinin jetkizip, basshyǵa osy jaǵyn úılestirýdi tapsyrdy.
"Paıdalanylmaǵan jer degen bolmaý kerek. Ony qaıtarý úshin eskertý, qanshama hattar, sotqa berýdiń uzaqqa sozylatyn protsess ekenin túsinemiz. Biraq maǵan malymyzdy óristetetin jaıylym jer joq dep shaǵymdanatyn turǵyndar kóp. Qanshama mıkronesıe alyp, túrli baǵdarlamalarǵa qatysyp jatatyndar mal jaıatyn oryn tappaı júr. Jerdi tıimdi paıdalana almaǵandar memleketke qaıtarý kerek. Osy jaǵynan jumysty kúsheıtińizder. Aıtalyq, Jitiqara aýdanyndaǵy turalap turǵan «Talap Astyq», «JerAna» seriktestikterin sot aqtap shyǵady, biraq olarda atqarylyp jatqan eshteńe joq. Ne ózderi egin salmaıdy, ne bireýge istetpeıdi. Osy jóninde usynys jasaýdy tapsyramyn, aldaǵy ýaqytta arnaıy keńes ótkizetin bolamyz. Mundaı faktiler jetip jatyr. Bizdiń maqsatymyz bireýdi qýdalaý emes, tek jerdi tıimsiz paıdalanǵandardy jónge keltirý qajet", - dedi A.Muhambetov.
