Arhımed Muhambetov jedel járdem qyzmetine birneshe reanımobıl tapsyrdy
QR Tuńǵysh Prezıdent kúni qarsańynda oblysta kóptegen mańyzdy is-sharalar ótip jatyr. Jańa áleýmettik nysandar paıdalanýǵa berilip, kásiporyndar ashylyp, turǵyn úı kiltteri tapsyrylýda. Sonyń biri Qostanaı aýdanynyń Zarechnyı aýylynda ótti. Oblys basshysy Arhımed Muhambetov jedel járdem qyzmetine «Ford Transit» markaly 5 reanımatsııalyq mashınanyń kiltin tapsyrdy.
«Oblystaǵy medıtsınalyq mekemelerdiń materıaldyq-tehnıkalyq jaǵdaıy jyl sanap artyp keledi. Bıyl oblystyń densaýlyq saqtaý salasyna 53 mlrd teńge bólingen. Medıtsına mekemelerin materıaldyq-tehnıkalyq jabdyqtaýǵa 2,2 mlrd teńge qarastyryldy. Jedel járdem qyzmeti de edáýir ilgeriledi. Bıyl 1 qańtardan bastap quramynda 23 aralyq stantsııasy bar oblystyq jedel medıtsınalyq járdem stansasy jumys isteı bastady. Sońǵy 3 jyl ishinde oblystyq bıýdjet esebinen 783 mln teńgege 30 sanıtarlyq avtokólik, 17 reanımobıl satyp alynǵan», - deıdi Arhımed Muhambetov.
Oblystyq jedel járdem stansasynyń bas dárigeri Irına Shteıgervaldtiń aıtýynsha, jedel medıtsınalyq kómek qyzmetin jaraqtandyrý halyqqa ýaqytyly jáne sapaly kómek kórsetýge múmkindik beredi.
«Oblystyq jedel járdem stantsııasynyń avtoparki kezekti ret jańartylady. Aımaq basshysy bizge 5 reanımobıl tapsyrdy. Kólikter zaman talaptaryna saı jabdyqtalǵan, búginnen bastap qyzmetke kirisýge daıyn. Osymen «103» qyzmetiniń kólik qajettiligi sheshildi»,- deıdi Irına Shteıgervald.
Jyl basynan beri «103» jedel járdem qyzmetine 30 feldsher jumysqa turǵan. Aldaǵy eki jylda taǵy 60 dáriger keledi dep kútilýde.