Arhımed Muhambetov zańsyz jer ıelengenderdiń jumysyn synǵa aldy
QOSTANAI. QazAqparat - Byltyr oblysta jer telimderin paıdalaný boıynsha 225 zańbuzýshylyq anyqtaldy. Bul týraly oblys ákimdiginde ótken jıynda jerdi qorǵaý jáne paıdalanýdy baqylaý jónindegi basqarmasynyń basshysy Nurlan Ábdýov málim etti, dep habarlaıdy QazAqparat.
Nurlan Ábdýovtyń aıtýynsha, ótken jyly jerdi qorǵaý jáne paıdalanýdy baqylaý jónindegi basqarma 391 tekserý júrgizgen. Sonyń nátıjesinde 225 zańbuzýshylyq anyqtalyp, 27,8 mln teńge aıyppul salynǵan. Qazirgi ýaqytta onyń 19,8 mln teńgesi oblys bıýdjetine qaıtaryldy. Qalǵan somany óndirip alý sot oryndaýshylarynyń quzyrynda.
«Búginde belgili bir qurylys jumystaryn júrgizý úshin jer telimderin suraıtyndar kóp. Biraq, olardyń keıbiri menshiginde ýchaskelerdi tıisti maqsatqa jumsap júrgen joq. Bir ǵana memleket menshigindegi jerdi zańsyz ıelený faktisi boıynsha 76 zańbuzýshylyq anyqtaldy, ıaǵnı 388, 2 gektar jer telimi paıdalynylmaı, bos jatyr. Keıbireýiniń jalǵa alý merzimi áldeqashan bitken. Endi bireýleri jerdi qorshap, qurylys materıaldaryn úıip qoıǵanmen, basqa qozǵalys joq. Olarǵa 13,5 mln teńge aıyppul salyndy, Munyń syrtynda aýylsharýashylyq maqsatyndaǵy 552,5 myń gektarǵa qatysty 102 fakt tirkelgen. Qazir jaýapkershilik mindeti júktelgen seriktestikter jibergen kemshilikterin túzep jatyr», - dedi basqarma basshysy óz baıandamasynda.
Memleket menshigindegi jer telimderin zańsyz ıelengen, kommertsııalyq qurylysqa arnalǵan jerlerdi kádege asyrmaǵan kásipkerler oblys ákiminiń synyna ushyrady. Jıynda Arhımed Muhambetov ár súıem jerdiń suraýy bar ekendigin uqtyrdy.
«Aýylsharýashylyq maqsatyndaǵy alqaptardyń ıgerilmeýine basa nazar aýdarý qajet. Jer telimderin alyp, ony kádesine jarata almaı otyrǵandar kásipkerlermen kúresti kúsheıtýge basa nazar aýdaryńyzdar. Sonymen qatar jer telimderin berýdi konkýrs arqyly sheshkennen góri aýktsıon arqyly ótkizgen durys. Sonda túsim de molaıady jáne bári ádil ótedi. Osy jaǵyn oılastyryp, bir júıege keltirgen jón. Sońǵy eki-úsh jylda biz birneshe myń gektar jer telimin berdik. Ony keıbir kásipkerler óz menshikterine qaratyp alǵan soń, qaıta satyp jiberedi. Al ol jerlerge jol salyndy, ınjenerlik júıe tartyldy. Oǵan qanshama qarajat jumsalatynyn Sizder jaqsy bilesizder. Endeshe, bul másele ońtaıly sheshilýi tıis», - dedi óńir basshysy.
Arhımed Muhambetov óz orynbasarlaryna jerdi maqsatty túrde paıdalanýdy baqylaýda ustaýdy jáne jekemenshik turǵyn úı qurylysyna tıesili jer telimderin anyqtaýdy tapsyrdy.
