Arhımed Muhambetov úzdik jastarǵa velosıped tapsyrdy

Jastar merekesi «QR Táýelsizdigine 25 jyl» saıabaǵynda ótti. Sharanyń ashylý saltanatyna deıin jastar arasyndaǵy oblystyq fýtzal týrnıri uıymdastyryldy. Jarystyń bas tóreshisi Mıras Adambaıdyń sózinshe, fýtbol básekesine 20 komanda qatysty. Tar alańdaǵy týrnırden Qostanaı aýdany ozyq shyqty. Olar fınalda Qarasý aýdanynyń fýtbolshylaryn utty.

Merekeniń resmı bóligine qatysqan oblys ákimi Arhımed Muhambetov elde jastarǵa jan-jaqty qoldaý kórsetilip kele jatqanyn aıtty.

«Qostanaı óńiriniń damýynda jastardyń úlesi joǵary. Muny óńirde ótip jatqan túrli áleýmettik sharalar rastaıdy. Qazirdiń ózinde 200-den astam belsendi jas «Qostanaı oblysy jastarynyń altyn kitabyna» endi. Mine, osy jastar keıinge úlgi bolyp, ózderin respýblıka kóleminde tanytyp júr. Bizdiń mindetimiz - jas urpaqtyń sanaly tárbıe, sapaly bilim alýyna jaǵdaı jasaý. Sizder, Qostanaı jastary, eldiń barlyq salada damýyna atsalysýlaryńyz qajet», - dep atap ótti oblys basshysy.

Arhımed Muhambetov jyl boıy joǵary jetistikterge jetken bir top jasty búgin de marapattady. Ákim úzdik jastarǵa baǵaly syılyqtar men velosıpedter tapsyrdy. Olardyń arasynda «Іsker jastardyń odaǵy» qoǵamdyq uıymynyń tóraǵasy, Arqalyq qalasyndaǵy úkimettik emes uıymdardyń resýrstyq ortalyǵynyń koordınatory  Darhan Kıkımov te bar.

«Arqalyq qalasynda isker jastar birigip, arnaıy ortalyq ashtyq. Mundaǵy maqsatymyz - azamattyq qoǵamdy jan-jaqty qalyptastyrý. Biz ózimizge senemiz, artylǵan jaýapkershilikti sezinemiz. Sondyqtan da ár isimizdiń nátıjesi bar. Búgingi oblys ákiminiń qolynan alǵan marapat sonyń bir dáleli», -deıdi D.Kıkımov.

Saıabaqtaǵy sharalar tizbegi jeke-jeke alańdarda jalǵasty. Turǵyndar asyq atý, toǵyzqumalaq, mafııa, tvıster, akvagrım, armrestlıng syndy kóńil-kóterý, sport oıyndaryn tamashalady. Jastar kúni ónerpazdardyń gala-kontsertimen aıaqtaldy.