Arhımed Muhambetov Tobyl jaǵalaýyndaǵy qurylys alańynda boldy
QOSTANAI. QazAqparat - Qostanaı oblysynyń ákimi Arhımed Muhambetov Tobyl ózeni jaǵasyndaǵy saıabaqty abattandyrý jumysymen tanysty, dep habarlaıdy QazAqparat tilshisi.
Qostanaı qalasy ákiminiń orynbasary Oljas Nurǵalıevtiń aıtýynsha, Tobyldyń sol jaq jaǵalaýyndaǵy qurylys jumystary aıaqtalyp qaldy.
Bıyl 430 mln teńgege ózen jaǵasyna deıingi 220 metr aýmaqty jóndeý josparlanyp otyr.
Onyń sózinshe, jaǵalaý mańyndaǵy eski úıler kedergi keltirýi múmkin.
«Turǵyndardyń kelisimimen eski úılerdi qulatý kerek. Degenmen, barlyǵy zań júzinde bolsyn. Úı ıelerine ótemaqy tóleńizder. Ózen jaǵasyna jaqyn úılerdiń qorshaýlaryn birdeı qalypqa keltirińizder. Oǵan demeýshilerdi tartý qajet. Kómektessin!» - dep tapsyrma berdi óńir basshysy.
Arhımed Muhambetov arnaıy velosıped jolyn salýdy usyndy. Sondaı-aq, jaǵalaýdaǵy joldardyń keskin-syzbasy ákimdiktiń resmı saıtyna ilinedi. Jaǵalaýdaǵy dýaldardaǵy sýretterdi kórgen ákim bul bastamany qoldaıtynyn aıtty.
«Munyń barlyǵy qalanyń kórki úshin jasalady. Sodan soń sapaly qum tóseý kerek. Osy arqyly qumdaǵy voleıboldy damytýǵa bolady. Jalpy, jaǵalaýda sport alańdary kóp bolýy tıis»,- dep sózin jalǵady Arhımed Begejanuly.
Aıta keteıik, jaǵalaýdaǵy qurylys 63 696 sharshy metr aýmaqty quraıdy. Jospar boıynsha, 1 qarashada alǵashqy nysandar tapsyrylady.
Óńir basshysy qala shetindegi «Koreı kópirinde» boldy. Jolaýshylar kóligi jáne avtomobıl joldary basqarmasynyń basshysy Ǵylymbek Shahmetov mundaǵy ekijolaqty joldyń ornyna tórtjolaqty ótpe jol salynatynyn málim etti. Kópirdiń uzyndyǵy - 250 metr.
«Joba quny 116 mln teńge shamasynda bolady. 15 jeltoqsan kúni bul aýmaqqa arnaıy saraptama jasalady. Negizi 2019 jyly kópirdi qaıta jańartatyn bolamyz», - dedi basqarma basshysy.
Arhımed Muhambetov kópirdiń qurylys-montajdaý jumystaryna kelesi jyly kirisýdi tapsyrdy.
