Arhımed Muhambetov senatorlarǵa óńirdiń jetistikteri men problemalaryn baıandady
QOSTANAI. QazAqparat - Qostanaı oblysyna jumys saparymen kelgen QR Parlamenti Senatynyń depýtattary óńirdegi óndiris oshaqtaryn aralap, eńbekkerlermen kezdesýdi josparlaýda, dep habarlaıdy QazAqparat tilshisi.
«Saparymyzdyń maqsaty - ınvestıtsııalar men sýbsıdııa máselelerin talqylaý. Eki kún boıy aımaqtyq kóshpeli otyrysqa qatysamyz. Osy aralyqta sharýalarmen júzdesip, usynys-pikirlerin tyńdaımyz», - dedi Senat depýtaty Jeńis Nurǵalıev.
Halyq qalaýlylary oblys ákimi Arhımed Muhambetovpen kezdesip, aımaqtyń tynys-tirshiligi jaıly áńgimelesti. Arhımed Muhambetov senatorlarǵa astyqty aımaqtyń birqatar máselesin baıan etti.
«Bıylǵy jyl biz úshin jemisti boldy. Sizderdi aımaqtaǵy iri kásiporyndardy aralaýǵa shaqyramyn. Onyń ishinde «Sokolov-Sarybaı» ken óndirý birlestigi men «SaryArqaAvtoprom» jáne «AgromashHoldıng» aktsıonerlik holdınginiń búgingi tirshiligimen tanys bolyńyzdar. Aýyl sharýashylyǵy salasynda «Mılh» sút ónimderin shyǵaratyn zaýyty men «Qarasý-Et» tsehi jemisti jumys istep otyr. Odan bólek, egistiktiń 98 paıyzy oryldy. 5 mln tonnaǵa jýyq astyq aldyq», - dedi oblys ákimi.
Sonymen qatar, Arhımed Begejanuly jýyrda Qytaıda ótken forýmǵa qatysyp, eki el arasyndaǵy ekonomıkalyq baılanystyń artyp kele jatqanyn aıtty.
«Qytaıda ótken forýmǵa qatystyq. Nátıjesinde, oblysymyzǵa birneshe ınvestordy tarttyq. Endi bizdiń oblysta maı óńdeıtin zaýyt ashylmaq. Onyń quny 100 mln eýroǵa baǵalanyp otyr. Óńirde problemalar da joq emes. Torǵaı jaqtaǵy aýyzsý máselesi de kún tártibinde tur. Jergilikti turǵyndar úshin tarıf qunynyń qymbattaýy da alańdatarlyq jaǵdaı. Ótken jyly 26 mln teńge bólingen, endi bıyl sol máseleni taǵy qaıta qolǵa alý kerek», - dedi aımaq basshysy.
Senat depýtattary erteń «Qarasý-Et», «Mılh», «QazNIISH» sııaqty birqatar kásiporyndy aralaıdy. Sondaı-aq, A.Baıtursynov atyndaǵy Qostanaı memlekettik ýnıversıtetine barady. Qorytyndy jıyn oblys ákimdiginde ótedi.
