Arhımed Muhambetov sábı ólimine baılanysty 4 bas dárigerdi jazalady
QOSTANAI. QazAqparat - Qostanaı oblysynda qalalyq jáne ortalyq aýdandyq aýrýhanalardyń tórt birdeı bas dárigerine qatań sógis jarııalandy, dep habarlaıdy QazAqparat tilshisi.
Arqalyq, Taran jáne Áýlıekól aýdandarynda sábıler óliminiń kóbeıgeni osyndaı sheshimge sebep bolǵan. Oblys ákimi Arhımed Muhambetovtiń aıtýynsha, atalǵan óńirlerdegi jaǵdaıdyń nashar bolyp otyrǵany bıyl ǵana emes.
«Eger birinshi jartyjyldyqtyń qorytyndylary boıynsha jaǵdaı ońalmasa - bosatamyz. Óıtkeni sizderdegi kórsetkish tipten nashar, bıyl ǵana aýtsaıderler qatarynda qalyp júrgen joqsyzdar», - dedi A. Muhambetov.
Oblystyq densaýlyq saqtaý basqarmasynyń keńeıtilgen alqasynda Erkin Dáýitbaev búgingi tańda óńirdegi medıtsına uıymdarynda medıtsınalyq aqparat júıesi belsendi túrde engizilip jatqanyn aıtty.
«Qazirdiń ózinde statsıonarlar men ambýlatorlyq-emhana qyzmetteriniń arasynda aýrýhanaǵa jatqyzý jáne shyǵarý, mobıldik qosymshany paıdalaný, turǵyndardy tirkeý, elektrondyq tólqujattar sekildi basty baǵyttar boıynsha aqparat júıesin belsendi túrde engizip jatqan medıtsına uıymdaryn atap kórsetýge bolady. Olar: Qostanaıdyń №3, 4 emhanalary, Rýdnyı, Arqalyq, Qostanaı perınataldyq ortalyqtary, oblystyq aýrýhana, oblystyq balalar aýrýhanasy, oftalmologııalyq aýrýhana, Arqalyqtaǵy perzenthana. Ókinishke qaraı, Jitiqara, Qarasý, Qarabalyq ortalyq aýdandyq aýrýhanalary kósh sońynda keledi», - dedi E. Dáýitbaev.
Óńir basshysy joǵaryda atalǵan aýdandardaǵy medıtsına mekemelerin tsıfrlandyrý jumystaryn baqylaýǵa aldy. Olardyń basshylary shilde aıynda jaǵdaıdy ońaltýǵa ýáde berdi.
