Arhımed Muhambetov reseılik dárigerlerge alǵys aıtty
QOSTANAI. QazAqparat - Arhımed Muhambetov qostanaılyq medıtsına qyzmetkerlerine keńes berip, praktıkalyq kómek kórsetkeni úshin Máskeý dárigerleriniń brıgadasyna alǵys aıtty, dep habarlaıdy QazAqparat.
«Reseı men Qazaqstandy ejelden dostyq baılanys biriktirýde. Bizdiń óńir Reseımen shekaralas, qarym-qatynasymyz ózara tıimdi yntymaqtastyqqa negizdelgen. Bir aı buryn Sverdlovsk jáne Chelıabilik medıtsına mamandary qostanaılyq dárigerlerge arnalǵan vıdeolektsııalar serııasyn bastady. Búgingi kúni 8 dáris ótkizildi. Eki apta buryn, Máskeý meri Sergeı Sobıanınmen kelisim aıasynda dárigerler bizdiń oblysqa keldi. Munyń bári tabysty yntymaqtastyqtyń taǵy bir kórsetkishi. Tek birge, jalpy kúsh-jigermen, bilimimizdi, tájirıbemizdi biriktire otyryp, biz bul aýrýdy jeńe alamyz»,- dep jazdy óńir basshysy áleýmettik jelide.
Arhımed Muhambetovtiń aıtýynsha, aımaqta epıdemıologııalyq jaǵdaıdyń turaqtanýy baıqalady. Jedel járdem shaqyrtýlary eki ese azaıyp, aýrýhanalardaǵy kereýet júktemesi tómendegen.
