Arhımed Muhambetov: Polıtseıler qoǵamnyń ár salasynda úlgi bolýy tıis

QOSTANAI. QazAqparat – Qostanaı oblysynyń ákimi Arhımed Muhambetov polıtsııa departamentiniń jeke quramymen kezdesti, dep habarlaıdy QazAqparat.

Oblys ákimi Arhımed Muhambetov ishki ister organdarynyń halyqpen tyǵyz qarym-qatynastyń servıstik modelin engizip, aýqymdy jumys júrgizip jatqanyn aıtty. Tıisinshe, bul – azamattardyń senim deńgeıin arttyrýǵa jáne «keri baılanys» ornatýǵa baǵyttalǵan keshendi shara bolmaq.

«Memleket basshysy halyqqa Joldaýynda polıtsııa jumysy ashyqtyqqa negizdelýi tıis degen mindet qoıdy. Osy mindetti iske asyrý úshin Qostanaı oblysy ákimdigi sońǵy jyldary 8 mlrd teńgege jýyq qarajat jumsaǵan. Bıyl polıtsııa departamentin materıaldyq-tehnıkalyq jaraqtandyrýǵa 1,7 mlrd teńge bólindi. Osynyń arqasynda baılanys quraldary, beıne baqylaý kameralary, zańbuzýshylyqtardy avtomatty túrde tirkeýdiń statsıonarlyq keshenderi satyp alyndy. Jalpy polıtseıler qoǵamnyń ár salasynda úlgi bolýy tıis. Osyny únemi este saqtaýlaryńyz qajet», - deıdi oblys ákimi.

Qostanaı oblysy PD bastyǵy, polıtsııa general-maıory Beket Aımaǵambetov óńirde qylmys deńgeıi aıtarlyqtaı tómendegenin atap ótti. Atap aıtqanda kisi óltirý, densaýlyqqa aýyr zııan keltirý, zorlaý, qaraqshylyq, tonaý, urlyq, alaıaqtyq, buzaqylyq jáne urlyq qylmystary azaıǵan. Tek «Avtoýragan» júıesiniń kómegimen ótken jyly 66 myńnan astam jol qozǵalysy erejesin buzý anyqtaldy.

2020 jyly aýyr jáne asa aýyr qylmystardyń anyqtalý deńgeıi 100%-ǵa jetken. Zańsyz aınalymnan 500 keliden astam esirtki tárkilendi.

«Tsıfrlyq Qazaqstan» baǵdarlamasyn iske asyrý sheńberinde qylmystyq isterdiń 85%-y elektrondyq formatta tergelip jatyr. Bul úshin oblystyń tergeý jáne anyqtaý bólimsheleri qajetti tehnıkamen jáne arnaıy qurylǵylarmen tolyq qamtamasyz etilgen.

Kezdesý barysynda oblys ákimine birneshe suraq qoıyldy. Qostanaı qalasy polıtsııa basqarmasy jergilikti polıtsııa qyzmeti bastyǵynyń mindetin atqarýshy Talǵat Júsipov Qostanaıda jańa shaǵyn aýdandar salynyp jatqanyn alǵa tartty. Soǵan sáıkes ýchaskelik polıtsııa pýnktterin salý qajettigi týyndap otyr. Búginde Qostanaı qalasynda polıtsııanyń bes tirek pýnkti qajet. Bular Qonaı, Áýejaı, Bereke, Ortalyq bazar móltek aýdandary men Drýjba aýylynda ornalasady.

Arhımed Muhambetov bul máseleni baqylaýǵa alatynyn aıtty.

Kezdesý sońynda patrýldik polıtsııa qyzmetkeri Baǵdat Beısenov óńir basshysyna ishki ister organdarynyń qyzmetkerlerin qoldaǵany úshin alǵysyn bildirdi.