Arhımed Muhambetov paramen ustalǵan aýdan ákimi týraly: Bul jaǵdaı meni alańdatty
«Qurmetti oqyrmandar, buqaralyq aqparat quraldarynan Áýlıekól aýdanynyń ákimi Ashat Kısıkovty sybaılas jemqorlyqqa qarsy qyzmet ustaǵanyn bilesizder. Qazirgi ýaqytta barlyq quzyretti organdar óz túsiniktemelerin berdi. Árıne, bul jaǵdaı meni de alańdatady. Sot sheshimi kúshine engenge deıin men túsiniktemelerden qalys qalamyn. Degenmen, barlyq memlekettik qyzmetshilerge sybaılas jemqorlyq qylmysyn jasamaýdy eskertemin», - dep jazdy oblys basshysy.
Sonymen qatar, Arhımed Muhambetov quzyretti organdarǵa qoldanystaǵy komıssııa sheńberinde sybaılas jemqorlyqqa qarsy is-qımyl jónindegi jumysty kúsheıtýge tapsyrma berdi.
Eske salsaq, Qostanaı oblysy sybaılas jemqorlyqqa qarsy is-qımyl departamenti oblystaǵy Áýlıekól aýdany ákiminiń para alý faktisin anyqtady.