Arhımed Muhambetov: Ortalyqtaǵy syra dúkenderin alyp tastańyzdar
QOSTANAI. QazAqparat - Qostanaı oblysynyń ákimi qaladaǵy áleýmettik nysandardy aralap, olardyń jaı-kúıin baqylady, dep habarlaıdy QazAqparat.
Arhımed Muhambetov áýeli oblystyq ákimdiktiń aldyndaǵy saıabaqty kórdi. Bul aýmaq bıyl naýryz aıynda «Saıabaq 2018» JShS-ne 10 jylǵa senimdi basqarýǵa berilgen bolatyn. Seriktestik basshysy Amangeldi Dosjanovtyń aıtýynsha, osy jyly saıabaqqa jańa attraktsıondar, batýttar satyp alyndy. Osy maqsatta 100 mln teńge bólingen.
«Turǵyndar bos ýaqyttary bolǵan kezde birinshi saıabaqqa keledi. Ózderińiz bilesizder, bul aýmaqta balalar kóp júredi. Biraq, osy ortalyqtaǵy syra satatyn dúkenderdi alyp tastaý kerek. Salaýatty ómir saltyn nasıhattaımyz dep júrmiz. Al sizder mynadaı nárselerge jol beresizder. Kelesi kelgende syra dúńgirshekteri myna arada bolmaıtyn bolsyn», - dep tapsyrma berdi Arhımed Muhambetov.
Qala ákimi Bazyl Jaqypov saıabaqta syra satatyn oryndardy jaqyn arada alyp tastaýǵa ýáde etti.
Munan soń oblys ákimi «Qostanaı aýlalary» baǵdarlamasymen jóndelgen kóshelerdi, «Áýejaı» shaǵyn aýdanyndaǵy ulttyq-mádenı ortalyqty aralady. Sonymen qatar óńir basshysyna «Bereke» móltek aýdanyndaǵy fýtbol manejiniń qurylysy tanystyryldy.
