Arhımed Muhambetov óńirde dáriger tapshylyǵy qalaı sheshilip jatqanyn aıtyp berdi
NUR-SULTAN. QazAqparat – Qostanaı oblysynyń ákimi Arhımed Muhambetov óńirdegi dárigerler jetispeýshiligi máselesin qalaı sheship jatqanyn aıtyp berdi, dep habarlaıdy QazAqparat tilshisi.
«Biz «Qazaqstan ıpotekalyq kompanııasymen» dárigerlerge 250 páter salý týraly kelisimge qol qoıdyq. Óńirdegi problemanyń biri - bizdiń oblysta joǵary medıtsınalyq oqý orny joq. Bizge Aqtóbe, Qaraǵandy, Semeı, Nur-Sultan qalalary men kórshi Reseıden dárigerler keledi. Biz olarǵa turǵyn úı berip, kómek kórsetemiz. Búginge deıin shamamen 255 adamdy tarttyq. Áıtkenmen áli de 250-270 dáriger jetispeıdi. Bir-eki aıdan keıin zeınetke shyǵatyn dárigerler bar bolǵandyqtan, bul protsesti toqtatý múmkin emes», - dedi oblys basshysy OKQ-da ótken baspasóz máslıhatynda.
Onyń aıtýynsha, búginde oblysta 6200 dáriger men 18 myńǵa tarta medbıke bar.
«Biz dáriger ǵana emes, medbıke tapshylyǵyn da sheship, kolledjderde jataqhana salyp jatyrmyz. Rýdnyıda Qostanaı medıtsınalyq kolledjiniń fılıalyn ashamyz. Tapshylyqty bir demde sheshý múmkin emes. Biraq jyl saıyn dárigerlerdi tartý boıynsha jumys júrgizetin bolsaq, onda 2021 jylǵa qaraı kadr tapshylyǵynan qutylamyz», - dedi Arhımed Muhambetov.
