Arhımed Muhambetov óńir turǵyndaryn sýmen jabdyqtaýdaǵy basty problemany atady

NUR-SULTAN. QazAqparat – Bıyl Qostanaı oblysynda aýyl halqyn sýmen jabdyqtaýǵa arnalǵan 21 joba júzege asyrylady Bul týraly Úkimet otyrysynda Qostanaı oblysynyń ákimi Arhımed Muhambetov aıtty, dep habarlaıdy QazAqparat tilshisi.

«Qostanaı oblysynda aýyl turǵyndaryn sýmen qamtamasyz etý deńgeıi respýblıka boıynsha eń tómen, 75 paıyzǵa da jetpeıdi. Jaǵdaıdy jaqsartý úshin qandaı jumys júrgizilýde?» dep surady Úkimet basshysy Álıhan Smaıylov óńir basshysynan.

Arhımed Muhambetov shyn máninde kórsetkishter tómen ekendigin jasyrmady.

«Oǵan belgili sebepter bar. Qostanaı oblysy jerasty tuşy sý tapshylyǵynan, tipti olardyń joqtyǵynan kúrdeli gıdrogeologııalyq jakǵdaımen sıpattalady. Keńes zamanynda jerasty sýlarynyń tapshylyǵynan oblystyń 266 aýyly 24 toptyq sý taratqysh arqyly qamtamasyz etildi. Onyń ishinde birneshe aýylǵa Qorǵan jáne Soltústik Qazaqstan oblystarynan jetkizildi. Qazirgi ýaqytta 10 toptyq sý taratqyshy jumys isteıdi. Olardan 60 aýylǵa sý tartylady. Qalǵan 14 toptyq sý taratqyshy 1990 jyly isten shyqqan. Sondyqtan 206 aýyl aýyz sýsyz qalǵan. Qazir biz olardy sýmen qamtamasyz etý jumysyn júrgizip jatyrmyz. 2021 jyldyń qorytyndysynda 2020 jylmen salystyrǵanda oblys boıynsha sýmen jabdyqtaý qyzmetterimen qamtamasyz etý edáýir artyp otyr. Aýyl halqy boıynsha 74,9 paıyzdy qurap, ósim 10,2 paıyz boldy. Qala turǵyndaryn da sýmen jabdyqtaý qyzmetterinde ósim bar», - dedi ol.

Óńir basshysynyń aıtýynsha, bıyl 37 jobany iske asyrýǵa 16,6 mlrd teńge kózdelgen. Resýpblıkalyq bıýdjetti naqtylaý kezinde taǵy da 10 jobaǵa 2,8 mlrd teńge bólindi. Bıyl 21 jobany paıdalanýǵa berý josparlanǵan. Sonymen qatar 66 aýylǵa tasymaldanatyn sý taratý pýnkti ornatylady. Nátıjesinde sýmen jabdyqtaý qyzmetterine qoljetimdilik ulǵaıady.