Arhımed Muhambetov oblystyq TJD jumysyn synǵa aldy
QOSTANAI. QazAqparat - Oblys ákimdiginde ótken jıynda Tótenshe jaǵdaılar departamentiniń bastyǵy Talǵat Kákimov óńirdegi órt qaýipsizdigi qyzmetiniń jumys nátıjeleri týraly esep berdi, dep habarlaıdy QazAqparat tilshisi.
Oblystyń tótenshe jaǵdaılar qyzmeti óńirde órt qaýipsizdigin saqtaý jáne ony aldyn alýdyń keshendi sharalaryn qolǵa alǵan. Órt qaýipsizdigi qyzmetkerleri búginge deıin jergilikti polıtsııamen birlese otyryp, 18 myń aýlaǵa baqylaý-tekserý júrgizgen. Departament mamandary jaz ystyǵynda órt qaýipsizdigin kúsheıtý týraly jeke páter ıeleri kooperatıvteri men saıabaq birlestikteriniń qatysýymen 226 jıyn ótkizip, turǵyn úılerdiń kire beristerine órt qaýipsizdigi erejelerin saqtaý jónindegi eskertpeler ilgen.
Josparly tekserý jumystary barysynda óńirde órt qaýipsizdigi talaptaryn saqtamaǵan 923 nysan anyqtaldy. Jaýapty tulǵalarǵa 5 mln teńge shamasynda ákimshilik aıyppul salynyp, 6 nysannyń jumysy 33 kúnge deıin toqtatyldy.
«QR Bas prokýratýrasynyń tapsyrmasymen TJD mamandary departamentte tirkeýde turǵan órt shyǵý qaýpi bar 60 saýda ornyn tekserdi. Olardyń ishinde oıyn-saýyq ortalyqtary, saýda úıileri, sýpermarketter men gıpermarketter bar. Tekseristen Qarabalyqtaǵy «Delıýks» saýda orny ǵana ótti. Qalǵan 59 saýda nysanynan 443 órt qaýipsizdigin buzý deregi anyqtalǵan. Olardyń birinde evakýatsııalyq shyǵý joldary jabyq, ekinshisinde órt belgisin beretin avtomatty qurylǵy isten shyqqan. Tekserý qorytyndysy boıynsha 59 zańdy tulǵaǵa jalpy somasy 462 962 teńge kóleminde aıyppul salynyp, anyqtalǵan kemshilikterdi joıý jóninde eskertý berildi. Munyń syrtynda, jalpy bilim beretin jáne mektepke deıingi tárbıe beretin 72 mekeme ǵımaratyna tekserý júrgizilip, 217 órt qaýipsizdigin saqtamaý deregi tirkeldi», - dedi departament bastyǵy.
Sala basshysynyń esebin tyńdaǵan oblys ákimi Tótenshe jaǵdaılar qyzmeti atqarǵan jumystarǵa kóńili kónshimeıtinin bildirdi. Oblys basshysy óńirde órttiń aldyn alý sharalary jetkilikti túrde júrgizilmeı jatqanyn aıtyp, Naýyrzym qoryǵynda bolǵan órtke kináli tulǵalardyń áli kúnge deıin anyqtalmaı otyrǵanyn synǵa aldy.
«Olar (turǵyndar - avtor) kóktemde qoqys qaldyqtaryn órtedi de, ony qaraýsyz qaldyrdy. Jel kóterildi de, aınalany túgel ot sharpydy. Bul oqıǵa týraly tekserý qujattarynyń qorytyndysy nege joq? Tabıǵat baılyǵyn órtegen kim? Ol nege anyqtalmady? Bul týraly men sizge 4 aı buryn tikeleı tapsyrma berdim. Nátıje qaıda? Kim kináli? Tabıǵı qoryqtardy saqtap, kúzetýdiń ornyna, ony órtep, joıýmen aınalysatyn basshylar bizge kerek emes. Erteń jumys kúniniń sońyna deıin órtke kináli kim ekenin anyqtap, qorytyndy shyǵaryp, qujatty aldyma ákelińiz»! - dedi Arhımed Muhambetov.
Eske salsaq, bıyl sáýir aıynda Naýyrzym memlekettik tabıǵı parkiniń aýmaǵynda qýraǵan shóp órtengen.
