Arhımed Muhambetov mańǵystaýlyqtardy Qostanaıǵa qonys aýdarýǵa shaqyrdy
MAŃǴYSTAÝ. QazAqparat - Turǵyndar tyǵyz ornalasqan aımaqtan jumys kúshi az óńirlerge azamattardy kóshirý jumystary boıynsha bıyl Qostanaı oblysyna 1118 adam qonys aýdarady, dep habarlaıdy QazAqparat oblys ákiminiń baspasóz hatshysy Jiger Sársenovke silteme jasap.
Búgin Qostanaı oblysynyń ákimi Arhımed Muhambetov bastaǵan delegatsııa Mańǵystaý oblysynyń Munaıly aýdanynda bos oryndar jármeńkesin ótkizdi.
Qostanaılyq delegatsııa mańǵystaýlyqtarǵa bos jumys oryndaryn usyndy. Máselen, oblysqa muǵalim, mehanızator, dáriger, kólik júrgizýshileri sııaqty mamandar jetispeıdi.
Ońtústik aımaqtardan kóship kelýshiler úshin Qostanaı oblysy 962 jumys ornyn daıyndap qoıdy. Oblys ákimi Arhımed Muhambetov kóship kelýshilerge barlyq jaǵdaıdyń jasalatynyn aıtty. Tipti, memleket kómeginen tys, Qostanaı aýdanynyń Mıchýrın jáne Glazýnov aýyldaryndaǵy kásipkerler turaqty jumys pen úı usynyp otyr.
«Bizdiń oblysymyzda 1 700-den astam jumys bos orny bar. Sonyń 20% aýyl sharýashylyǵy, 17% qurylys, 13%-dan astamy ónerkásip salalaryna tıesili. Sol sebepti, bizdiń oblysqa kelińizder. Sizderdi shaqyrý úshin ózim delegatsııany bastap kelip otyrmyn. Baspana máselesinen qıyndyq týmaıdy. Men Aqtóbe oblysynda jumys istedim. Batys óńirlermen salystyryp qaraǵanda úıdiń baǵasy Qostanaıda arzan. Nátıjeli jumyspen qamtý baǵdarlamasyna qatysyp, kásip bastaımyn deseńizder, ony da qoldaımyz. Shaǵyn nesıe berý kólemi de artady. Negizinen, aǵymdaǵy jyly oblys boıynsha nátıjeli jumyspen qamtý jáne jappaı kásipkerlikti damytý baǵdarlamalaryna 1 mlrd teńgeden astam qarajat qarastyryldy», - dedi Arhımed Muhambetov.
Jalpy, soltústik aımaqtarǵa kóshý úshin otbasynyń árbir múshesine memleket tarapynan 84 175 teńge mólsherinde qarjylaı kómek beriledi. Bir jyl boıy úıdi jalǵa alý jáne kommýnaldyq qyzmetterge aqy tóleý úshin 72 150 teńgege deıin qarjy tólenedi. Sondaı-aq, jańa jumys ornyn ashyp, qonys aýdarýshylardy turaqty jumyspen qamtyǵandarǵa árbir jumysker úshin 450 AEK kóleminde sýbsıdııa qaralǵan.
Delegatsııa quramynda oblys ákiminiń orynbasary Marat Júndibaev, oblys ákimi apparatynyń basshysy Arman Ábenov, jumyspen qamtýdy úılestirý jáne áleýmettik baǵdarlamalar basqarmasynyń basshysy Gúlnar Ábenovalar bar.
Aıta keterligi, 2016 jyly Qostanaıǵa basqa oblystardan - 19, 2017 jyly - 30 ǵana otbasy qonys aýdarǵan. 2018 jyly bul kórsetkish 10 esege ulǵaıdy. Bıyl Qostanaı oblysy 272 otbasyn qabyldaýǵa daıyn. Onyń ishinde 35 otbasy Qostanaı qalasyna qonys aýdarmaq.
