Arhımed Muhambetov qus tumaýynyń taralýy týraly: Jaǵdaı erekshe baqylaýda

ARQALYQ. QazAqparat – Qostanaı oblysynyń ákimi Arhımed Muhambetov jumys saparymen Arqalyq qalasyna bardy, dep habarlaıdy QazAqparat tilshisi.

Oblys ákiminiń baspasóz hatshysy Saıat Júsipov aıtqandaı, Arhımed Muhambetov qus tumaýynyń odan ári taralýyp ketpeýine baılanysty Arqalyq qalasynyń basshylyǵyna óńirlik jospar qurýdy tapsyrdy. Aıta keteıik, buǵan deıin Arqalyq qalasyndaǵy qus fabrıkasynda 296 446 qus qyrylyp qalǵany belgili bolǵan edi.

«Jumyrtqa óndirýmen jáne satýmen aınalysatyn «Agroınterptıtsa» JShS-ǵa bardym. Qus tumaýynyń taralýyna jol bermeý jónindegi aǵymdaǵy jaǵdaımen tanystym. Munda karantın engizildi, jaǵdaı erekshe baqylaýda. Qazirgi daǵdarysqa qaramastan kásiporyn basshylyǵyna qyzmetkerlerdi qysqartýǵa jol bermeýdi usyndym. Jaǵdaıdy retteý úshin jumys jospary qurylady», - dep jazdy Arhımed Muhambetov áleýmettik jelide.

Arqalyqqa sapary barysynda óńir ákimi 7500 bas maldy baǵýǵa qolaıly mal sharýashylyǵy kesheniniń qurylysyn qarap shyqty. Jobanyń jalpy quny – 3,5 mlrd teńge. Nysannyń iske qosylýy 2 kezeńde júzege asady. 2021 jylǵy aqpanda bordaqylaý alańy, al 2021 jylǵy qyrkúıekte reprodýktor kesheni engiziledi.

Oblys ákimi «Jiger» stadıonyna da bardy. Bıyl bul stadıonnyń sport zaly kúrdeli jóndeýden ótti.

Ákim sapary qaladaǵy № 2 orta mektepte jalǵasty. Munda kúrdeli jóndeý aıaqtaldy. Oǵan qazynadan 381,4 mln teńge bólindi.

«Odan keıin Arqalyq óńirlik aýrýhanasyna baryp, jóndeý jumystarymen tanystym. Sondaı-aq dári-dármek qoryn qarap shyqtym.Dári-dármekter qory shamamen 3 aıǵa jetedi. Sapar qorytyndysy boıynsha Arqalyq qalasynyń ákimi Q.Ábishevke qalanyń odan ári áleýmettik-ekonomıkalyq damýy boıynsha jumys júrgizýdi tapsyrdym», - dep atap ótti aımaq basshysy.