Arhımed Muhambetov: Qurǵaqshylyqtan zardap shekken sharýalarǵa qoldaý kórsettik
«Bıyl jazdyq egis kólemi 4,7 mln ga qurady. Dándi daqyldarmen - 4 mln ga jýyq, onyń ishinde 3,3 mln ga - bıdaı egistigimen qamtylǵan. Egis alqaptarynyń qurylymyn ártaraptandyrýdy jalǵastyrý sheńberinde maıly daqyldar egistigi 510 myń gektarǵa deıin ulǵaıtyldy. Egin jınaý jumystarynyń qorytyndysy boıynsha 3 mln tonna astyq bastyryldy. Jınalǵan astyq kólemi sharýashylyqtarǵa birinshi kezektegi qajettilikti jabýǵa, mal qystatýdy júrgizýge, aldaǵy jyldyń egis jumystaryna daıyndalýǵa múmkindik beredi. Bul rette tuqym tolyq kólemde qambaǵa quıyp alyndy», - dedi Arhımed Muhambetov OKQ-da ótken baspasóz máslıhatynda.
Ákimniń aıtýynsha, qurǵaqshylyqtan zardap shekken sharýashylyqtarǵa memlekettik qoldaý kórsetilgen.
«QazAgro» holdıngi qarjy ınstıtýttary aldyndaǵy mindettemelerdi 2020 jyldyń jeltoqsanyna deıin uzartýǵa múmkindik berdi. Kóktemgi egis jáne egin jınaý jumystaryn júrgizýge alynǵan kredıtter, tehnıka lızıngi, mal sharýashylyǵyn damytýdyń salalyq baǵdarlamalary boıynsha tólemderge jeńildik jasaldy. Oblystyń 4 qalasy men 6 aýdanynda táýligine - 22,4 tonna, aıyna - 673 tonna qalyptyq nandy pisirýge arnalǵan unǵa qajettiliktiń táýliktik normasymen 25 naýbaıhana qamtyldy. Qurǵaqshylyq aımaǵyna kiretin qalalar men aýdandardyń ákimdikteri nan baǵasyn ustap turý boıynsha úshjaqty memorandým jasasty. Qurǵaqshylyqqa ushyramaǵan aımaqtardyń ákimdikteri (8 aýdan) naýbaıhanalarmen ekijaqty memorandýmǵa qol qoıdy», - dedi ol.
