Arhımed Muhambetov kompanııa basshylaryna eskertý jasady
QOSTANAI. QazAqparat - Sońǵy jyldary Qostanaı oblysynda eńbek qatynastarynyń buzylý jaǵdaılary jıileı tústi. Osyǵan qatysty 2017 jyldyń qorytyndylary boıynsha ákimdikte ótken keńeıtilgen otyrysta oblys ákiminiń orynbasary Marat Júndibaev baıandama jasady, dep habarlaıdy «QazAqparat» HAA tilshisi.
Oblys ákimi orynbasarynyń aıtýynsha, 2017 jyly eńbek qatynastary boıynsha ýákiletti organǵa jumysshylardyń eńbek quqyǵynyń buzylǵany týraly myńnan astam shaǵym túsken.
«2016 jylmen salystyrǵanda anyqtalǵan quqyqbuzýshylyqtar 37 paıyzǵa kóbeıip otyr. Munyń ishindegi eńbek qatynastary 34 paıyz, eńbek qaýipsizdigin qorǵaý 81 paıyzǵa, halyqty jumyspen qamtý boıynsha tártipbuzýshylyq 2 ese ósken»,-deıdi M. Júndibaev.
Shaǵymdardyń basym bóligin eńbekaqy tóleý máseleleri quraǵan.
«Ótken jyly myńdaǵan jumysshyǵa 120 mln teńgeniń jalaqysy óndirilip berildi. Jalpy 250 mln teńgeniń qaryzyn qaıtaryp bere aldyq. Búgingi tańda eńbekaqy boıynsha bir ǵana mekemeniń moınynda 1,1 mln teńgeni quraıtyn qaryz tur. Ol Qostanaıdaǵy «APN» JShS»,-dedi oblys ákiminiń orynbasary.
Jıyn barysynda kásiporyndar men boryshker kompanııa basshylarynyń esimderi ataldy. Aıyppul salynǵanyǵa qaramastan, kóptegen kásiporyndar eńbek zańnamasyn buzýdy jalǵastyrýda. Jalaqy tólemeı qoıýymen qatar keıbir mekeme basshylary óz qyzmetkerlerin zeınetaqy tólemderinen aıyryp otyr.
Basshylardyń barlyǵy oblys ákimi Arhımed Muhambetovtyń aldynda esep berdi.
«Eń bastysy barlyq jumys berýshilerge qatysty bizdiń óz tetikterimiz bar. Men qorqytyp, úrkitip turǵan joqpyn tek sypaıy túrde ákimshilik kodekstiń 87 babyn esterińizge salyp, eskertip turmyn. Únemi monıtorıng jasap otyramyz, jalaqy qaryzdarynan qutylmaǵandarǵa aıyppul salyp, shara qoldanamyz»,-dedi oblys basshysy.
