Arhımed Muhambetov qarajatty josparsyz jumsaǵan kásiporyndy synǵa aldy
QOSTANAI. QazAqparat - 2012 jyly iske qosylǵan «Maslozavod Kostanaıa» JShS óz jumysyn toqtatty. Bul týraly oblys ákimdiginde ótken jıynda belgili boldy, dep habarlaıdy «QazAqparat» HAA tilshisi.
Aıta ketý kerek, 2011 jyly «Maslozavod Kostanaıa» JShS-ne 88 mln teńge bólindi. Atalǵan joba Qostanaı oblysynyń Indýstrııalandyrý kartasyna engizildi.
«Qazir bul kásiporyn bankrotqa ushyraý aldynda tur. Nysannyń múlki men ónimderi nesıeleýshi «Tobyl» áleýmettik-kásipkerlik korporatsııasynyń quramyna ótti. Toqyraýdyń sebebi retinde kásiporyndaǵy álsiz menedjment qarastyryldy», - dedi Qostanaı oblysy ákimdiginiń kásipkerlik jáne ındýstrııalyq-ınnovatsııalyq damý basqarmasynyń basshysy Isa Qudabekov.
Óz kezeginde oblys ákimi Arhımed Muhambetov kásiporynnyń bólingen aqshany josparly túrde jumsaǵanyna kúmán keltirdi.
«2011 jyly seriktestikke 88 mln teńge bólindi. Ol kezde dollar baǵamy tómen bolatyn. Men bul zaýytta boldym. Shynymdy aıtaıyn, barlyq aqshanyń josparly jumsalǵanyna úlken kúmánim bar. Quryltaıshylar jumys istegisi kelmeıdi. Zaýyt dırektorlarynyń qandaı qyzmet atqarǵany da belgisiz. Sot-qurylys saraptamalar júrgizildi me? Muny da eshkim aıta almaıdy», - dedi óńir basshysy.
Arhımed Muhambetov aldaǵy dúısenbide quqyq qorǵaý organdary, prokýratýra ókilderi, sybaılas jemqorlyqqa qarsy kúres agenttigi qyzmetkerleriniń qatysýymen jıyn ótkizýdi tapsyrdy.
«Kinálilerdi zańdy turǵyda jaýapqa tartamyz! Bir de bir qujat joq. Bul qalaı bolǵany? Bankrotqa ushyraý protsesi de jalǵan bolýy múmkin. Olardyń 88 mln teńge bıýdjet qarjysyn jymqyryp otyrǵany týraly suraq týyndaıdy. Men bul máseleni óz baqylaýyma alamyn. Bólingen ár tıyn óz esebimen jumsalýy tıis!» - dedi A.Muhambetov.
