Arhımed Muhambetov: Karantın rejımi úsh kezeńmen jeńildetiledi
QOSTANAI. QazAqparat – Qostanaı oblysynyń ákimi Arhımed Muhambetov aımaqtaǵy shekteý sharalaryn jeńildetýge baılanysty úndeý jarııalady, dep habarlaıdy QazAqparat oblys ákiminiń baspasóz qyzmetine silteme jasap.
«Bizdiń oblysta 3 kún boıy COVID-19 juqtyrýdyń birde-bir oqıǵasy anyqtalǵan joq. Bul az bolsa da oń nátıje. Buǵan bizdiń oblysymyzdyń ár turǵynynyń shydamdylyǵy men parasattylyǵynyń arqasynda qol jetkizdik. Sizderdiń árqaısyńyzǵa jeke jaýapkershilikpen shekteýdi saqtaǵanyńyz úshin shyn júrekten alǵys aıtamyn. Qurmetti qostanaılyqtar! Keshe Qazaqstan Respýblıkasynyń Prezıdenti Q. Toqaev eldegi koronavırýs boıynsha qazirgi jaǵdaı týraly málimdeme jasady. Karantınniń shekteý sharalaryn kezeń-kezeńmen jeńildetý tapsyryldy. Bizdiń oblysta qalyptasqan jaǵdaıdy eskere otyryp, karantın rejımin úsh kezeńde jeńildetýdi uıymdastyrý týraly sheshim qabyldandy», - delingen oblys basshysynyń úndeýinde.
Sonymen búgingi kúnnen bastap óńirde qarjy jáne saqtandyrý sektorynyń, avtojýý, turmystyq jáne uıymdastyrý tehnıkasyn jóndeý sheberhanalarynyń jumysy qaıta jandandy. Saǵat 9.00-den 20.00-ge deıin aýla alańdarynda serýendeýge ruqsat etildi.
«Bul rette sizdiń qaýipsizdigińiz úshin aýmaqtardy dezınfektsııalaý qamtamasyz etiledi. Oblystaǵy epıdemıologııalyq jaǵdaıǵa baılanysty aldaǵy ýaqytta jumysty bastaıtyn uıymdardyń qosymsha tizbesi anyqtalatyn bolady. Ásirese qostanaılyqtardy alańdatatyn másele saıajaıǵa barý bolyp tur. Árbir óńirde sheshimdi sol aımaqtyń ákimi basqaratyn jedel shtab qabyldaıdy. Mysaly, Rýdnyı jáne Lısakov qalalarynda saıajaı ýchaskelerine barýǵa ruqsat etilgen, biraq birqatar shekteý bar. Qostanaıda búginnen bastap jeke avtokólikpen 6.00-den 8.30-ǵa deıin saıajaıǵa barýǵa jáne 18.00-den 20.00-ge deıin saıajaıdan qaıtýǵa ruqsat etiledi», - dedi Arhımed Muhambetov.
Qostanaı oblysynda 1 mamyrdan bastap saıajaılarǵa baratyn qoǵamdyq kólikter jumys isteı bastaıdy, jol júrý tegin bolady. Óńir ákimi úndeýinde turǵyndardy barlyq qajetti sanıtarlyq normalardy saqtaýǵa shaqyrdy.
