Arhımed Muhambetov egis naýqanyn jaz bastalǵansha aıaqtaýdy tapsyrdy
QOSTANAI. QazAqparat - 2018 jyly Qostanaı oblysynda egis alqaptaryn ártaraptandyrý protsesin jalǵastyrý josparlanyp otyr, dep habarlaıdy QazAqparat.
Búginge deıin Tobyl óńirinde barlyǵy 57 myń gektarǵa dándi daqyldar sebildi. Endigi jumystar tek aýa-raıyna baılanysty. Tıisinshe, «Qazgıdromet» ortalyǵynyń mamandary mamyr aıynyń sońyna deıin jaýyn-shashyn túspeıtinin boljap otyr. Oblys ákimi Arhımed Muhambetov apparat májilisinde kúnniń jylylyǵyn paıdalanyp, dán sebý jumystaryna kirisýdi tapsyrdy. Eger tabıǵat tosyn minez tanytpasa, kóktemgi dala jumystary 3 maýsymǵa deıin aıaqtalýy múmkin. Ótken jyly tolassyz jaýǵan jańbyrdyń saldarynan egis naýqany maýsymnyń basynda ázer bitken edi.
«Ár aýdan dala jumystaryna jumyla kirissin. Tez arada egip bitirý qajet. 15 mamyrda egis jumystary bastalyp, 3 maýsymda aıaqtalýy tıis. Agroóndiris kesheni sýbektilerin qoldaý boıynsha sharalardy jyldamdatyńyzdar. Nesıeleý Agrarly kredıttik korporatsııasy arqyly júrgiziledi. Osy maqsatta bizdiń oblysqa 10 mlrd 600 mıllıon teńge qarastyryldy. Buǵan qosa janar-jaǵar maıdy tasyp alý jaǵynan irkilis bar. Óńirge 71 myń tonna dızeldik otyn bólingenin bilesizder. Ázirge onyń 48 myńy ǵana jetkizildi. Janar-jaǵar maıdy satyp alý jóninen Arqalyq qalasy, Naýyrzym, Amangeldi, Qarabalyq, Taran aýdandarynyń kórsetkishteri tómen. Atalǵan aýdandar dál ýaqytynda satyp almasa, keıin baǵa ósip ketýi múmkin. Osyny da eskerińizder», - dedi Arhımed Muhambetov apparat májilisinde.
Aıta keteıik, bıyl oblys boıynsha maıly daqyldardy ósirýdi 26,5% arttyrý kózdelgen. Sol sebepti, egis alqaptaryn ártaraptandyrý protsesi jalǵasady. 2017 jyly bıdaı alqaptarynyń kólemi 2,8% qysqaryp, maıly daqyldardyń egistik kólemi 30,5% artqan. Sondyqtan da byltyr aýyl sharýashylyǵy salasynda jalpy ónim 3,5% ósti. Mundaı úrdis aǵymdaǵy jyly da jalǵasatyn bolady. Bıdaı alqaptaryn 5,9% qysqartyp, esesine maıly daqyldar ósirý úshin alqap kólemi ulǵaımaq.
