Arhımed Muhambetov depýtattarǵa esep berdi
Jıyn barysynda aımaq ákimi koronavırýstyq ınfektsııamen kúres jáne óńirdiń áleýmettik-ekonomıkalyq damýy boıynsha júrgizilip jatqan jumystar týraly baıandady. Jalpy ótken jeti aıdyń qorytyndysy boıynsha oblysta negizgi makroekonomıkalyq kórsetkishterdiń ósýi baıqalady.
«Ónerkásip óndirisiniń naqty kólem ındeksi 106,5%, aýyl sharýashylyǵy 102,0%, negizgi kapıtalǵa ınvestıtsııalar 113,8%, qurylys jumystary 114,3%, turǵyn úıdi paıdalanýǵa berý 108,4% ósken. Ónerkásip óndirisiniń ósimi 6,5%-dy qurady. Kásiporyndar 18,9% ósimdi qamtamasyz etti. Jyl basynan beri mashına jasaý óndirisi 1,5 esege ulǵaıdy. Óńdeýdegi úlesi shamamen 42,1%-dy quraıdy. Máselen, «SaryarqaAvtoProm« kompanııasy qysqa merzimde 19,5 myńnan astam tehnıka óndirip, óndiristik ósimdi 1,7 esege ulǵaıta alǵan. 2020 jylǵa arnalǵan josparda 50 myńǵa deıin avtomobıl shyǵarý kózdelgen, onyń 14 myńy eksportqa jiberiletin bolady. Jyl basynan beri 3 564 avtokólik eksporttaldy. Avtobýstarǵa keletin bolsaq, olardy 2020 jyldyń sońyna deıin 800-ge jetkizý kózdelgen. Qazirgi ýaqytta osy jospardyń 70,1% oryndalǵanyn aıta ketken jón», - deıdi óńir basshysy.
Arhımed Muhambetov oblysta iske asyrylyp jatqan basqa da ınvestıtsııalyq jobalar týraly da aıtyp berdi. Jańartylatyn energııa kózderi salasynda Qostanaı aýdanynda «Jel Elektrık» JShS qýaty 50 MVt jel elektr stantsııasynyń qurylysyn júrgizýde. Al Arqalyq qalasynda AÓK baǵytynda eki joba júzege asyrylmaq. Atap aıtqanda, 5 myń basqa arnalǵan bordaqylaý alańy, «Torǵaı et» JShS 2,5 myń iri qaraǵa shaqtalǵan óndiris oshaǵy turǵyzylady. «GrainMark» seriktestigi elevator men qurama jem zaýytyn iske qosýdy josparlap otyr.