Arhımed Muhambetov aýyl turǵyndarynyń máselelerin tyńdady
QOSTANAI. QazAqparat – Oblys ákimi Arhımed Muhambetov Denısov jáne Qamysty aýdandaryna jumys saparymen baryp Nur Otan partııasynyń jergilikti keńsesinde turǵyndardy qabyldady, dep habarlaıdy QazAqparat.
A.Muhambetovtiń Nur Otan partııasy keńsesindegi qabyldaýyna eki aýdannyń turǵyndary jazylǵan. Qamysty aýdanyna qarasty Arqa aýylynyń birneshe azamaty byltyr aýyz sýmen qamtylǵan eldi mekenge endi gaz qubyry tartylsa ıgi bolar edi degen tilekterin jetkizse, Denısov aýdanynyń turǵyndary kópten kútim kórmegen keıbir kitaphana, mýzeı ǵımarattary sııaqty rýhanııat oshaqtaryn jóndeýden ótkizýge kómek surady.
«Gaz problemasy oblys boıynsha keshendi túrde sheshilip keledi. Memleket basshysynyń arnaıy tapsyrmasy bar. Biraq, dál búgin-erteń gaz tartyp beremiz dep aıta almaımyz. Kezek keledi. Jalpy, oblys kóleminde myńdaǵan áleýmettik nysandar kúrdeli jóndeýden ótti. Bul jumystar toqtap qalmaıdy. Aýyl turǵyndarynyń máseleleri únemi nazarymyzda. Al kitaphana, mýzeı ǵımarattaryn jóndeý týraly bastamalaryńyzdy qoldaımyn», - dedi aımaq basshysy.
Oblys ákiminen kómek suraı kelgen turǵynnyń biri – Nekrasov aýylynyń turǵyny Nadejda Strogova. Bul aýyl bir-eki jyl buryn kógildir otynmen qamtylǵan. Eńbek ardageri qazir eki páterli úıdiń jartysynda turatynyn, kórshisi gazben, ózi kómirmen ot jaǵyp otyrǵanyn aıtyp, óńir basshysynan úıine gaz engizip berýdi ótindi. A.Muhambetov kógildir otynnan qaǵylǵan keıýananyń úıine tez arada gaz qubyry engizilý kerektigin aıtyp, bul mindetti aýdan ákimine tapsyrdy.
Arhımed Muhambetov Qamysty aýdanyndaǵy Altynsarın orta mektebine bardy. Qazaq jáne orys synyptary aralas oqıtyn bul oqý oshaǵynda 250 bala bilim alady. Bıyl mektep 295 mln teńge bıýdjet qarjysyna kúrdeli jóndeýden ótken. Bilim mekemesiniń ǵımaraty tolyqtaı jańartylyp, sport zaly, pándik kabınetteri qaıta jabdyqtalǵan. Mektep jynynan 45 balaǵa shaqtalǵan ınternat salynǵan. Altynsarınniń aınalasyndaǵy shaǵyn aýyldardyń balalary aldaǵy jyldan bastap osy ınternatta jatyp oqıdy.
Oblys ákimi pedagogtarmen júzdesip, mektep synyptaryn aralap kórdi. Sport zalyna bas suǵyp, jas sportshylardyń jattyǵýyn tamashalady. Robototehnıka kabınetine kirip, oqýshylarmen áńgimelesti. Bul kabınetti balalarǵa «Altynsarın» seriktestigi 8 jarym mln teńge qarjyǵa jabdyqtaǵan. Arxımed Muxambetov mektepke kúrdeli jóndeý júrgizgen merdiger jumysyna oń baǵa berdi.
