Arhımed Muhambetov: Ataýly kómek halyqty masyldyqqa emes, eńbekke yntalandyrýy tıis
Qostanaı oblysynda jyl basynda ataýly áleýmettik kómek 8 myńdaı adamǵa berilse, qazir olardyń sany 40 myńǵa jýyqtap otyr. Osylaısha, óńirde 8 289 otbasyna 1711,4 mln teńge kóleminde ataýly áleýmettik kómek berilgen. Gúlnár Ábenovanyń aıtýynsha, ataýly áleýmettik alatyndardyń 2148-i – kóp balaly otbasylar. Al 2 jarym myńǵa jýyq adam eńbekke qabiletti jasta.
«Búginde «Eńbek» baǵdarlamasy boıynsha kóp balaly jáne turmysy tómen azamattardy, jastardy jumyspen qamtý úshin qosymsha qarjy bólingen. Bul qarjy «Bastaý bıznes» kásipkerlik jobasy aıasynda jumyssyzdarǵa shaǵyn nesıeler bólip, olardyń kásipkerlikpen aınalysýyna yqpal etedi. Biz bul jumystardy áli de júıeleı túsetin bolamyz. Ásirese, jas mamandarǵa kóp kóńil bólinedi», - dedi basqarma basshysy.
Oblys ákimi Arhımed Muhambetov barlyq aýdandar men qalalarda ataýly áleýmettik kómek alýshylardy anyqtaý barysynda muqııat bolýdy tapsyrdy.
«Keıbir azamattar ataýly áleýmettik kómek alý úshin ótirik ajyrasý, jumystan shyǵý, óz múlkin basqaǵa jazý arqyly tabysyn azaıtyp kórsetý, qolyndaǵy malyn soıyp tastaý sııaqty alaıaqtyqqa barady. Buǵan jol bermeý kerek. Sondyqtan barlyq aýdandar men qalalarda ataýly kómek bólýdi qatań baqylaýǵa alyp, kez kelgen alaıaqtyq pen jemqorlyqty qatań jazalaý kerek. Kómek ataýly túrde kórsetilýi tıis. Bul – Úkimet otyrysynda Memleket basshysy Qasym-Jomart Toqaevtyń barlyq óńirlerge bergen tikeleı tapsyrmasy. Áleýmettik baǵdarlama az qamtylǵan otbasylardyń ómir súrý sapasyn jaqsartýǵa baǵyttalǵan. Sondyqtan ataýly áleýmettik kómek halyqty masyldyqqa emes, eńbekke yntalandyrýy tıis», - dedi oblys basshysy.
A.Muhambetov aýdan jáne qala ákimdikterine memlekettik baǵdarlamalardyń múmkindikterin tıimdi paıdalana otyryp, eńbekke qabiletti ataýly áleýmettik kómek alýshylardy turaqty jumyspen qamtý, olardyń turmysyn jaqsartý baǵytyndaǵy sharalardy jalǵastyrýdy tapsyrdy.
