Arhımed Muhambetov: Arqalyqtyń ónerkásibine «ekinshi dem» berý qajet
QOSTANAI. QazAqparat - Qostanaı oblysynyń ákimi Arhımed Muhambetov Arqalyq qalasynyń áleýmettik-ekonomıkalyq damýynyń qorytyndylary týraly jıyn ótkizdi, dep habarlaıdy QazAqparat tilshisi.
Indýstrııalyq-agrarlyq baǵyt - Arqalyq qalasy ekonomıkasynyń basty kórsetkishi. Ónerkásip oryndary qala óndirisi úlesiniń 50%-dan astamyn quraıdy. Ótken 8 aıda qala 5 mlrd 726 mln teńgeniń ónimin shyǵardy.
«Qalanyń ekonomıkasyna 1 mlrd 469 mln teńge ınvestıtsııa salyndy. Ótken jyldyń osy kezeńimen salystyrǵanda bul kórsetkish 1,5 esege artyq. Byltyr ınvestorlar óndiris oryndaryna 999 mln teńge qarjy quıdy. Memlekettik bıýdjet kiristeri 101%-ǵa oryndaldy. Qyzmetkerlerdiń ortasha jalaqysy 5%-ǵa kóbeıdi», - dedi Eldar Kúzembaev óz baıandamasynda.
Bıyl turǵyndardy áleýmettik qamsyzdandyrý aıasynda qala bıýdjetinen 45 mıllıon teńgeden astam somaǵa ataýly áleýmettik jáne turǵyn úı kómegi tólendi. Jyl basynan beri turǵyn úı qurylysynyń 1 myń 724 sharshy metri paıdalanýǵa berildi. Jumyspen qamtý boıynsha áleýmettik qorǵaý sharalarymen 1 myńnan astam adam qamtyldy. Resmı tirkelgen jumyssyzdyqtyń deńgeıi 1,8%-ǵa jetip otyr.
2018-2022 jyldarǵa arnalǵan qonystandyrý Kartasyna sáıkes, ońtústik óńirlerden Arqalyq qalasyna turaqty turý úshin 12 otbasy kóship keldi. Barlyq otbasy músheleri jumysqa ornalastyryldy. Kóship kelýge, turǵyn úıdi jalǵa alý jáne kommýnaldyq qyzmetteri úshin shyǵyndaryn óteýge 5 mln teńge sýbsıdııa bólindi.
Ótken jyldarmen salystyrǵanda Arqalyq qalasynyń aýyl sharýashylyǵy salasynda aıtarlyqtaı ósim baıqalady. Qyrkúıek aıyna deıingi málimet boıynsha Arqalyqtyń aýyl sharýashylyǵy óniminiń kólemi - 4 mlrd 971 mln teńge.
Arhımed Muhambetov Arqalyq qalasynyń ındýstrııalyq-agrarlyq baǵytyna jaqsy baǵasyn berdi. Degenmen, óńir basshysy jekeleı kórsetkishter boıynsha basshylardyń jumysyn synǵa aldy.
«Men búgin qaladaǵy et kombınatynyń jumysyn kórdim. Endi Arqalyqqa osyndaı taǵy da 3-4 áleýetti óndiris ornyn salý qajet. Sondyqtan shaǵyn jáne orta bıznesti damytý mańyzdy. Taǵy bir másele, sanaýly jyldan soń qala quraýshy óndiris orny TBRÝ-dyń jumysy toqtaıdy, al ǵımaraty bos qalmas úshin oblystaǵy qarqyny nashar zaýyttardy Arqalyqqa kóshirý kerek. Bir sózben aıtqanda, ónerkásip ornyna «ekinshi dem» berý qajet. Sondyqtan tynymsyz eńbek etińizder. Qajet bolsa, ınvestorlardy tartamyz. Mekeme basshylary, xalyqpen etene baılanysa jumys istesin. Bizdegi basshylar jumysqa otyrysymen, shirenip, xalyqqa qaramaı ketedi. Ózderińizdi kórsetip abyroı jınaǵansha, jumystyń nátıjesimen maqtanyńyzdar! Bul medıtsına salasyna da qatysty. Óńirde 37 dáriger jetispeıdi. Muny bas dáriger sheshe almasa, jumysynan bosatamyz»,-dedi Arhımed Muhambetov jıyn barysynda.
Oblys ákimi jumys sapary barysynda Amankeldi, Jankeldın, Naýyrzym aýdandarynyń áleýmettik-ekonomıkalyq kórsetkishterimen tanysady. Oblys ákiminiń orynbasary Meıirjan Myrzalıev ońtústik aýdandardaǵy shaǵyn jáne orta bıznestiń damýy týraly baıandama jasaıdy.
Eske salsaq, búgin Qostanaı oblysynyń ákimi Arhımed Muhambetov jumys saparymen Arqalyq qalasyna bardy.
