Arhımed Muhambetov Arqalyqqa jumys saparymen bardy

Óńir basshysy «Áýlıekól-Jaldama» tasjoly jóndeý jumystary barysymen tanysty. Jol jóndeýge bıýdjetten 1 mlrd teńge bólingen bolatyn. Qazirgi kezde joldyń jıegi men bujyrly bólikterin tegisteý jumystary qaldy. Munan soń Arhımed Muhambetov Amankeldi aýdanyna qarasty Amantoǵaı aýylyndaǵy sý qubyry jaǵdaıyn baqylady. Qubyr júrgizý úshin 500 mln teńge bólingen. Sý tazartqysh nysany jylyna 143,16 myń kýb sýdy elekten ótkizedi.  Qubyr jelisiniń uzyndyǵy - 21,7 shaqyrym.

Oblys ákimi Arqalyqtaǵy «Vozrajdenııa» JShS egis alqabynda boldy. Bıyl jergilikti sharýalar 278 myń 400 gektar jerge dán septi. Onyń 5 myń 100 gektary maıly daqyldar. Búginde eki óńirde de egin oraǵy aıaqtalýǵa jaqyn. Atap aıtqanda, 214 myń gektardyń egini orylyp, 95 myń 900 tonna astyq bastyryldy. Eginniń ortasha túsimi gektaryna 4,5 tsentnerden aınalýda. Oraq naýqanyna 225 aýylsharýashylyq ónim óndirýshileri, onyń ishinde 25 JShS, 200 jeke sharýa qojalyqtary qatysqan.

«Agroınterptıtsa» qus sharýashylyǵynyń da jaqsy jańalyqtary bar. Jaqynda taǵy bir ınvestıtsııalyq joba iske qosyldy. Qus fabrıkasynda 240 adam eńbek etedi. Sharýashylyqtyń 15 qorasynda 675 myń bas qus ósirilýde. Ótken jyly kásiporyn 101 mln jumyrtqa óndirip, úkimet tarapynan 267 mln teńge sýbsıdııa aldy. Bıylǵy jyldyń josparynda 133 mln ónim shyǵarý mindeti tur. Kózdelgen sýbsıdııa kólemi - 300 mln teńge.

Jańa oqý jyly bastalǵanymen Arqalyq polıtehnıkalyq kolledji ǵımaratyndaǵy qurylys jumystary aıaqtala qoımaǵan. Oblys basshysy oqý korpýsyn aralap, jiti tanysyp shyqty. Arhımed Muhambetov bas merdiger «Eńbek» JShS basshysyna jumysty jedeldetýdi tapsyrdy.

Búginde Arqalyq jylý elektr kompanııasynyń otyn saqtaý oryndarynda 1 myń 448 tonna mazýt bar. Qalany qys boıy tolyq jylýmen qamtamasyz etý úshin 23 myń tonna mazýt qajet. Jergilikti ákimdikke jylý qazandyqtaryn taǵy bir qarap, maýsymǵa daıyndyqty pysyqtaý tapsyryldy.