Arhımed Muhambetov: Aqtóbedegi jaǵdaı bizde de qaıtalanýy múmkin
Búgin oblys basshysynyń tóraǵalyǵymen Qostanaı qalasyn damytý máselelerine arnalǵan keńes ótti. Jıynda Qostanaı qalasyndaǵy Qoǵamdyq qadaǵalaý komıssııalarynyń úılestirý keńesiniń tóraǵasy Tatıana Zemlıanaıa eskirgen lıftterdi jóndeý boıynsha qıyndyqtar týyndap jatqanyn aıtty.
«Bizdiń úılestirý keńesi qadaǵalaıtyn kópqabatty úılerdegi lıftter ábden eskirdi. Tipti 25 jyl buryn paıdalanýǵa berilgenderin qoldanyp kelemiz. Keıbiri paıdalanýǵa múldem jaramsyz. Endi olardy jóndeýge kómek berseńizder eken. Bul turǵyndardyń ótinishi», - dedi T.Zemlıanaıa.
Qostanaı qalasynyń ákimi Bazyl Jaqypovtyń aıtýynsha, qazirgi ýaqytta qala bıýdjetinen lıft aýystyrýǵa qarjy bólinbeıdi. Sebebi, ol turǵyn úılerdi jańǵyrtý baǵdarlamasy boıynsha iske asyrylady. Óz kezeginde oblys ákimi eskilerin jóndeýge, aýystyrýǵa arnalǵan aımaqtyq baǵdarlama qurýdy tapsyrdy.
«Jaqynda osyndaı tozyǵy jetken lıft kesirinen Aqtóbede bir áıel qaza boldy. Dál mundaı jaǵdaı bizdiń jaqta da bolmaýyna kim kepil. Qostanaıda 1960 jyldary paıdalanýǵa berilgen kópqabatty úıler bar. Endi ózderińiz esepteı berińizder, olardaǵy lıftterdiń turǵanyna qansha jyl? Qalada 272 lıft bar. Bul sonshalyqty kóp emes. Mysaly, Reseıdegi Şerbınsk zaýytyndaǵy lıftterdi 5-8 mln teńgege satyp alýǵa bolady. Osyǵan baılanysty baǵdarlama quryp, depýtattardyń kelisimimen jóndeýge nemese aýystyrýǵa qarjy bólińizder», - dedi Arhımed Muhambetov.
Oblys basshysy lıftterdi jóndeýge arnalǵan aımaqtyq baǵdarlamany oblystaǵy basqa qalalarda da qabyldaýdy usyndy.
