Arheologtar Jankentten sensatsııalyq olja tapty
QYZYLORDA. KAZINFORM – Qyzylorda oblysynyń Qazaly aýdanyndaǵy ortaǵasyrlyq Jankent qalashyǵynda bastalǵan qazba jumysy Shahrıstan bóligindegi turǵyn úıler aýmaǵynda jalǵasyp jatyr.
Oblystyq tarıhı-mádenı murany qorǵaý ortalyǵynyń málimetinshe, arheologtar ejelgi shahardyń mádenı qabattaryn ashý barysynda sensatsııalyq oljaǵa keneldi.
- Qazba nátıjesinde birneshe qysh ydys synyqtary, asyqtar jáne janýarlardyń súıegi tabyldy. Qysh buıymdar turǵyndardyń kúndelikti turmysynda paıdalanylǵan ydystardyń túrleri men jasalý erekshelikterin, al janýar súıekteri sharýashylyqtyń negizgi baǵyttaryn anyqtaýǵa jáne turǵyndardyń azyq-túlik tutyný tásilderin zertteýge múmkindik beredi. Barlyq jádiger tirkelip, ólshemderi alynyp, tıisti ǵylymı qujattamaǵa engizildi. Alynǵan materıaldar qalashyq turǵyndarynyń turmys-tirshiligi, sharýashylyǵy jáne mádenı ómiri týraly jańa derekterdi anyqtaýǵa negiz bolmaq, - delingen habarlamada.
Tabylǵan jádigerlerge aldaǵy ýaqytta zerthanalyq jáne ǵylymı taldaý jasalady.
Eske salsaq, jýyrda Jankent qalashyǵynda oblys ákimdiginiń qoldaýymen arheologııalyq qazba jumysy qolǵa alyndy.
