Arheologter sý astynan ejelgi jádigerlerdi tapty
ASTANA. KAZINFORM – Zhanibekov University arheologııalyq ortalyǵynyń zertteýshileri Túrkistan oblysy, Ordabasy aýdanyndaǵy Bógen sý qoımasynda barlaý jumystaryn júrgizdi.
Bıyl jyl basynan bastalǵan qýańshylyqtyń saldarynan qoımanyń arnasy tarylǵan edi. Sý qoımasy astynda qalǵan tarıhı-mádenı eskertkishterge ekspedıtsııa bir aptaǵa jalǵasyp, nátıjesinde qundy jádigerler tabyldy.
Ǵylym jáne joǵary bilim mınıstrligi málimetinshe, bul jádigerler – keıingi paleolıt pen mezolıt kezeńine tıesili eńbek quraldary. Bir jerde shoǵyrlanǵan keıingi paleolıt kezeńine tıesili 10-ǵa jýyq haltsedon tasy, nýkleýster jáne kesýge, jonýǵa arnalǵan tas plastınalar bar.
Sý erozıtsııasy nátıjesinde tas kezeńine tıesili jádigerler muqııat zerttelindi.
Sonymen qatar keıingi qola dáýirine jatatyn birneshe jerleý oryndaryna qazba jumystary júrgizildi. Jerleý ornynda adam múrdesi nashar saqtalǵan. Syrty geometrııalyq syzyqtarmen bezendirilgen keramıkalyq ydystar, sondaı-aq ortańǵy bóligi qoladan jasalyp, syrty altynmen kómkerilip qaptalǵan samaı áshekeıin erekshe aıtýǵa bolady. Shyǵyrshyq, qoladan jasalynǵan qos bilezik, kenerli syrǵa men bas kıimdi ásemdeýge paıdalanǵan kóptegen usaq monshaqtar da tabyldy.
Arheologııalyq ortalyq jetekshisi A.Podýshkın, ǵylymı qyzmetker G.Stamqulovanyń aıtýynsha, Túrkistan oblysy aýmaǵynan áli kúnge deıin bul kezeńge tıesili osyndaı buıymdar tabylmaǵan.
Ekspedıtsııa kezinde qańly-sarmat kezeńine jatatyn jerleý orny da anyqtaldy. Bul jerde jaýyngerdiń janynan úsh qanatty, qanattary tómenge qaratylǵan sapty jebe ushtary, turmystyq pyshaq, qumyra jáne toǵa tabyldy. B.z.d. І ǵ. – b.z. І ǵ. merzimdeledi. Buǵan qarap óńirde kóne dáýirden bastap adamdardyń tolassyz mekendeýi jalǵasyp otyrǵanyn baıqaýǵa bolady.
Qazba jumystary óńirdegi Ulttyq tarıhı-mádenı qoryq qyzmetkerlerimen birlesip atqaryldy. Jádigerler zerdelenip, keıinnen murajaıǵa ótkiziledi.
Aıta keteıik, Qazaqstan arheologteri Pavlodar oblysynan saq dáýirine tıesili qola pyshaqtar tapty.
Arheologııa jáne qazba jumystarymen 20 jyldan astam aınalysyp júrgen Álkeı Marǵulan atyndaǵy arheologııa ınstıtýty Erte metall arheologııa bóliminiń basshysy, Phd, aǵa ǵylymı qyzmetker ári trasolog Albına Erjanova Kazinform agenttiginiń tilshisine zamaýanı arheologııa men ondaǵy áıelderdiń orny týraly aıtyp berdi.
Almatylyq arheologter saq dáýirine tıesili altyn júzik tapty.