Arheologtar Rostov oblysynda Altyn orda kezeńindegi monetalar kómbesin tapty

DONDAǴY ROSTOV. TASS- QazAqparat – Azov murajaı-qoryǵynyń arheologtary XIV ǵasyrda Altyn ordanyń Azak qalasy ornalasqan, qazirgi Rostov oblysyndaǵy Azov qalasy aýmaǵynda júrgizgen qazba jumystary kezinde 32 orda monetasyn tapty, dep habarlaıdy QazAqparat TASS agenttigine silteme jasap.

Bul týraly TASS agenttigine tarıh ǵylymdarynyń kandıdaty, murajaıdyń arheologııa bóliminiń meńgerýshisi Andreı Maslovskıı baıandady.

«Jibek jeıdeniń qıyndysyna oralǵan qazyna tabyldy. Ázirge qazba jumystary Petrov jelekjolynda júrgizilgen (2019 jyly arheologtar Azovtyń ortalyǵynda kólemdi qazba jumystaryn júrgizgen edi), restavratorlardyń tazalaýǵa talaı ýaqyty ketti. Biraq eń bastysy, bul qazynanyń Azak úshin data boıynsha jalǵyz bolyp tabylatynyn aıta ketý kerek», - dedi ol arheologtardyń buǵan deıin Azak aýmaǵynda ejelgi zamanǵy qazynalardyń tabylmaǵanyn qosyp.

Maslovskıı Azaktaǵy tas úılerdiń jabynqyshpen jabylǵanyn anyqtaýǵa múmkindik bergen taǵy bir oljanyń úlken qyzyǵýshylyq týdyrǵanyn atap ótti.

«Byltyr bul tas ǵımarattardy anyqtaý kezinde Azakta jabynqysh bolǵany belgili boldy, biraq Orta ǵasyrdaǵy jabynqysh eki túrli edi – tegis jáne jartylaı dóńgelek naýa túrinde. Basqa altynordalyq qalalarda da jabynqysh eki túrli ǵana bolsa, Azakta – tek naýa ǵana. Ótken jyly Azak sheberleriniń jabynqyshty tek naýadan ǵana salý ádisin oılap tapqanyn túsiný múmkin bolǵan, bul jańalyq sol ýaqyttyń qurylysyn aıqyndap otyr. Munda qamys emes, jabynqysh shatyry bolǵany anyqtaldy», - dep atap ótti ǵalym.