Arheologtar Mysyrdyń ońtústiginen taǵy bir sfınksti tapty
KAIR. QazAqparat - Arheologtar Mysyrdyń ońtústigindegi Kom-Ombo ǵıbadathanasyn jerasty sýynan tazartý kezinde denesi janýar, basy adam tárizdes sfınks músinin tapty. Bul jóninde jeksenbi kúni Kóne mura máseleleri jónindegi mınıstrlik málim etti, dep habarlaıdy TASS agenttigi.
Ejelgi ister jónindegi joǵarǵy keńestiń bas hatshysy Mustafa Vazırıdiń aıtýynsha, tabylǵan jádiger Ptolemeı dáýirine (b.z.d. 331 jyl - b.z. 31 jyl) jatýy múmkin.
Músin vedomstvo taratqan kommıýnıkede kórsetilgen. Kólemi asa úlken emes. Tuǵyrdyń negizi boıynsha eni - 28 sm. Sfınkstiń basynda Ýadjıt patshaıym-ábjylannyń beınesi salynǵan patshalyq bas kıim - ýreı bar. Músinniń beınesin perǵaýynnyń saqaly aıaqtaıdy. Jer astynan tabylǵan eskertkish sol qalpy, tipti kóziniń, qasy men qarashyǵynyń qara tústi boıaýy da saqtalyp qalǵan.
Kom-Ombo ǵıbadathanasyndaǵy jóndeý jumystary bir jyldan beri júrgizilip keledi. Osy ýaqyt aralyǵynda ol jerden birneshe arheologııalyq jádiger tabylǵan.
Ejelgi Mysyrda Kom-Ombo eldiń besinshi nomynyń (provıntsııasynyń) astanasy bolǵan. Ol týraly bastapqy derekter Alǵashqy ótpeli kezeńde anyqtaldy (b.z.d. XX ǵasyr).
Ptolemeı dáýirinde (b.z.d. IV ǵasyrdan bastap) Kom-Omboda tastan eki ǵıbadathana turǵyzyldy. Ordanyń bir jaq qanaty qoltyraýyn beınesindegi Sebek qudaıǵa, ekinshi jaǵy - suńqarǵa uqsaǵan Gorý qudaıǵa arnalǵan. Ǵıbadathanany dekoratsııalaý jumysy b.z. II-III ǵ.ǵ. aıaqtaldy.
Foto: Egyptian Ministry of Antiquities via AP
