Arheologter Mysyrda Ejelgi patshalyq dáýirine tıesili qabirlerdi tapty

ASTANA. KAZINFORM — Mysyrdyń ońtústik-shyǵys bóliginde, Nil ózeniniń batys jaǵalaýynda ornalasqan Kýbbet-ál-Hava nekropolinde júrgizilgen qazba jumystary kezinde ǵalymdar jartasqa qashalyp jasalǵan birneshe qabirdi anyqtady. Bul qabirler Ejelgi patshalyq kezeńine (b.z.d. XXVIII–XXIII ǵasyrlar) jatady. Bul týraly Daily News Egypt habarlady.

Ǵalymdardyń paıymdaýynsha, bul qurylystar Birinshi ótpeli kezeńde (b.z.d. XXII–XXI ǵasyrlar) jáne Orta patshalyq dáýirinde (b.z.d. XXI–XVIII ǵasyrlar) qaıta paıdalanylǵan.

Mysyr kóne muralary jónindegi Joǵarǵy keńestiń egıpet eskertkishteri sektorynyń basshysy Mohamed Abdel Badı eki jerleý kamerasynan ártúrli kólem men pishindegi shamamen 160 qysh ydys tabylǵanyn málimdedi. Olar suıyqtyqtar men astyq saqtaýǵa arnalǵan. Ydystardyń kópshiligi jaqsy saqtalǵan jáne olardyń betinde ıeratıkalyq jazýlar (ejelgi mysyr jazýynyń bir túri) bar.

Qabirlerdiń syrtqy aýlasynan Orta patshalyq kezeńine tıesili artefaktiler jınaǵy tabyldy. Olardyń qatarynda qola aınalar, alebastr ydystar, túrli-tústi monshaqtar jáne ártúrli tumarlar bar.

Týrızm jáne kóne muralar mınıstri Sherıf Fathı mundaı jańalyqtar Mysyrdyń álemdik mádenı týrızm kartasyndaǵy ornyn nyǵaıtatynyn atap ótti.

Mysyrlyq arheologtar mıssııasy Kýbbet-ál-Hava nekropolindegi jumystaryn jalǵastyryp jatyr. Bul jerde osy ýaqytqa deıin Ejelgi patshalyq dáýirinen bastap grek-rım kezeńine deıingi ýaqytqa jatatyn jerleý oryndary tabylǵan.

Aıta keteıik, bıyl Mysyrda 10 myń jyl burynǵy tastar arasynan baspana tabyldy. 

Sondaı-aq ǵalymdar Mysyr pıramıdalaryna qatysty jumbaq qurylystyń syryn ashty.