Arheologtar Qalmaqqyrylǵandy zerttep jatyr

NUR-SULTAN. QazAqparat – «Rýhanı jańǵyrý» baǵdarlamasynyń aıasynda áıgili Qalmaqqyrylǵan aýmaǵynda keshendi arheologııalyq-etnografııalyq zertteý jumystary júrip jatyr, dep habarlaıdy QazAqparat.

XVIII ǵasyrdaǵy qandy shaıqasqa kýá bolǵan aýmaqtaǵy zertteý jumystary 1 tamyzda bastalypty.

Pavlodar oblysynyń Maı aýdanynda ornalasqan aýmaqta «Qazaqstan arheologııalyq qoǵamy» qoǵamdyq uıymynyń basshysy Vıktor Merts bastaǵan zertteýshiler jumys istep jatyr.

Qalmaqqyrylǵan taýlary bir jaǵynan búkil Saryarqanyń taǵdyryn sheshken atyshýly shaıqastyń orny bolsa, ekinshi jaǵynan ulttyq murany boıyna jasyrǵan tabıǵı eskertkish deýge bolady. Nysan aýmaǵynda qola jáne erte temir dáýiriniń eskertkishteri bar. Vıktor Merts ol eskertkishti 2008 jyly da zerttegen. Eskertkish qola jáne erte temir dáýirindegi Soltústik-Shyǵys Saryarqa kóshpelileriniń jerleý rásimderinen habar beredi.

8 tamyz kúni bul mańǵa Álkeı Marǵulan atyndaǵy arheologııalyq ortalyq pen S.Toraıǵyrov atyndaǵy PMÝ ǵalymdarynyń qatysýymen Pavlodar oblysynyń ákimi Bolat Baqaýov bastaǵan ekspedıtsııa uıymdastyrylǵan. Ekspedıtsııa kezinde Qalmaqqyrylǵan taýlarynan jerleý rásimin eske salatyn kóptegen belgiler tabylyp, jartastaǵy jazýlar anyqtaldy. Ǵalymdar Áýlıeúńgirdi zerttep, «Qyzqulaǵan», «Gaýhar bıigi», «Bas malaı», «Orta Malaı», «Kishi Malaı», «Qarnaq» jáne basqa da kóptegen ańyz-dastandardy qaǵazǵa túsirgen. Qalmaqqyrylǵan taýlary men Túndik ózeniniń aralyǵyndaǵy topnoımıkalyq ataýlar da ǵalymdardyń zertteý nysanyna aınalmaq.