Arheologtar 5 qarýymen jerlengen sarbazdardy tapty - Aqtóbe oblysy (FOTO)
ASTANA. QazAqparat - Bıylǵy dalalyq maýsymda Qazaqstan Respýblıkasy Ulttyq mýzeıiniń «Halyq qazynasy» ǵylymı-zertteý ınstıtýty elimiz boıynsha ár tarıhı kezeńderdi qamtıtyn onnan astam nysanda arheologııalyq zertteý jumystaryn júrgizýde. Kezekti zertteýlerdiń biri - Aqtóbe oblysynyń Qobda aýdanynda ornalasqan j.s.d. VI-V ǵǵ. jatatyn Tórtoba jerleý-ǵuryptyq kesheninde jalǵasty, dep jazady e-history.kz.
Bul keshendegi bıylǵy atqarylǵan jumystar men alynǵan maǵlumattar týraly ekspedıtsııa jetekshisi, tarıh ǵylymdarynyń kandıdaty Aqan Ońǵaruly qysqasha baıandaıdy.
«Savromattyq jergilikti bılik áýleti ókiliniń qurmetine salynǵan Tórtoba jerleý-ǵuryptyq keshenindegi zertteý jumystary 2011 jyldan bastalǵan-dy.
Bes jyldyq keshendi zertteýler barysynda eskertkishtiń aınalasynan ár tarıhı kezeńniń 7 jerleý orny men 2 ǵuryptyq rásimder atqarǵan nysandar zerttelindi.
Іri arhıtektýralyq eskertkish sanalatyn dıametri 50 m, bıiktigi 4,7 m topyraq úıindili obada qurylystyń salyný kezeńderin anyqtaýǵa baılanysty qazba jumystaryn júrgizý barysynda bıyl eki jaýyngerdiń tonalmaǵan jerleý orny ashyldy. Bul qabirler negizgi eskertkish turǵyzylǵannan birneshe júz jyldan keıin jasalynǵan. «Er qýaty - qarýy» degendeı, eki jaýynger atý qarýy - oqqa toly qoramsaqty sadaqpen (sadaqtyń tek izi saqtalynǵan), túıreý qarýy - temir ushty naızasymen jáne qylysh, qanjarymen birge jerlengen. Oba úıindisiniń ortasyndaǵy negizgi qabir shuńqyrynyń shetine qoıylǵan úshinshi jaýyngerdiń qoramsaǵynan 184 qola jebe tabyldy», - deıdi A.Ońǵaruly.
