Arheologııalyq muraǵa qaýip: Sıanda týrıst eki terrakota jaýyngerin zaqymdady

ASTANA. KAZINFORM — Er adam ejelgi saz balshyqtan jasalǵan músinderge ártúrli dárejede zaqym keltirgen, dep jazdy Kazinform agenttiginiń menshikti tilshisi The Guardian-ge silteme jasap.  

Senbi kúni Qytaı bıligi Sıan qalasyndaǵy terrakota jaýyngerleri ornalasqan arheologııalyq qazbada jergilikti týrıst qorshaýdan asyp ótip, shuńqyrǵa sekirip, eki ejelgi músindi zaqymdaǵanyn habarlady.

30 jastaǵy er adam juma kúni áıgili terrakota armııasy ornalasqan mýzeıge kelgen. Polıtsııa málimetinshe, ol «qorshaý men qorǵanys torynan asyp ótip, tómen sekirgen». Resmı málimdemede er adamnyń psıhıkalyq aýytqýy bar ekeni aıtylǵan. Qazirgi ýaqytta oqıǵaǵa qatysty tergeý júrgizilip jatyr.

— Er adam saz músinderdi ıterip, tartyp, nátıjesinde ekeýine ártúrli dárejede zaqym keltirgen. Ony mýzeıdiń kúzet qyzmetkerleri ustaǵan, — dep habarlaıdy The Guardian.

Mýzeı derekterine sáıkes, týrıst sekirip túsken qazbanyń tereńdigi 5,4 metrge deıin jetedi.
Terrakota armııasy shamamen b. z. d. 209 jyly Qytaıdyń tuńǵysh ımperatorynyń kesenesin kúzetý úshin jasalǵan. Bul toptamada shamamen 8000 saz músin bar jáne ol Qytaıdaǵy eń mańyzdy arheologııalyq jańalyqtardyń biri bolyp sanalady. Sonymen qatar, bul ejelgi qytaı óneri men áskerı sheberliktiń sımvoly retinde tanymal.

Bul armııa Soltústik Qytaıdaǵy Shensı provıntsııasynyń astanasy — Sıan qalasynyń basty kórneki oryndarynyń biri bolyp tabylady. 1987 jyldan bastap ıÝNESKO-nyń dúnıejúzilik muralar tizimine engizilgen.

Mýzeı qyzmetkeri AFP agenttigine senbi kúni bergen suhbatynda ekspozıtsııa qalypty rejımde jumys istep turǵanyn habarlaǵan.