Arheologııalyq materıaldardyń memlekettik qory jasalady

ASTANA. KAZINFORM — Arheologııalyq materıaldardyń memlekettik qory jasalady. Bul týraly Májilistiń jalpy otyrysynda tarıhı-mádenı mura obektilerin qorǵaý máselelerine arnalǵan zań jobasyn tanystyrǵan depýtat Ashat Aımaǵambetov aıtty.

— Arheologtar jappaı jádigerlerdi tabady. Biraq keıin sol tabylǵan dúnıeler qaıda ketedi, qaıda tapsyrylady – birkelki júıe joq. Birin sórelerde shań basyp jatyr, biri joǵalyp ketken. Al bir bóligi esepke alynbaǵan. Endi biz arheologııalyq materıaldardyń memlekettik qoryn jasaımyz. Mýzeılik qundylyǵy bar jeke jádigerler zańda bekitilgendeı mýzeıge beriledi. Al jappaı jádigerler men tabylǵan materıaldar – depozıtarııde, ǵylymı ortaǵa ashyq, qaýipsiz jaǵdaıda saqtalady. Bul sheshim – arheologııalyq muranyń saqtalýyna múmkindik beredi, - dedi Májilis depýtaty.

Onyń aıtýynsha, zań jobasynda qazbadan keıin arheologııalyq obektini óz keıpinde saqtaý men aınalasyn qalpyna keltirý kózdelgen.

— Keı arheologııalyq jumystardan keıin qazba orny jabylmaıdy, rekýltıvatsııa tolyǵymen jasalmaıdy. Tipti eskertkishterdiń ózi búlinedi. Jobada árbir arheolog qazbadan keıin jerdi qalpyna keltirý týraly, ıaǵnı konservatsııa-rekýltıvatsııa jumystaryn júrgizý boıynsha talaptar naqtylanady, - dedi ol. 

Aıta keteıik, Májilis zańsyz arheologııalyq qazba jumystaryn tyıatyn zań jobasyn talqylap jatyr.