Arheologııalyq materıaldardy jınaqtaý: Memlekettik qor qurylady
ASTANA. KAZINFORM — Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine tarıhı-mádenı mura obektilerin qorǵaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy.
- Zańnyń negizgi erejelerine toqtalsaq, tarıhı-mádenı mura obektilerin qorǵaý ári paıdalaný salasyndaǵy qyzmetti lıtsenzııalaý júıesin ózgertý jáne lıtsenzııalardyń jańa túrlerin berýge qoıylatyn biliktilik talaptaryn qaıta qaraý eskerilgen. Ekinshiden, arheologııalyq jumystar barysynda anyqtalǵan tarıhı-mádenı mura obektileri týraly barlyq málimetti jınaqtaý úshin Arheologııalyq jumystar boıynsha biryńǵaı avtomattandyrylǵan aqparattyq júıeni qurý qarastyryldy. Úshinshiden, jappaı arheologııalyq oljalar men materıaldardy ortalyqtandyrylǵan túrde jınaý, ornalastyrý jáne saqtaý maqsatynda Memlekettik qor men Ulttyq depozıtarıı qurý nazarǵa alyndy, - dedi Májilis depýtaty Rınat Zaıyt.
Sonymen qatar, jumys tobynyń músheleri zań jobasynyń normalaryn jaqsartý jáne eldiń tarıhı-mádenı murasyn saqtaý boıynsha jańa usynystar engizdi.
Bul turǵyda tarıhı-mádenı mura obektilerin saqtaý jáne paıdalaný jónindegi qoldanystaǵy uıymdardyń qyzmetiniń biryńǵaı tártibin aıqyndaý, arheologııalyq jumystardy júrgizý kezinde tehnıkalyq quraldardy paıdalaný tártibin retteý, sondaı-aq arheologııalyq jumystar barysynda anyqtalǵan tarıhı-mádenı mura obektileri úshin qorǵaý aımaqtaryn belgileý jáne basqa da normalar bar.
- Balalardyń quqyqtaryn qorǵaý maqsatynda zań jobasynda kámeletke tolmaǵandarǵa bilim berý-saýyqtyrý qyzmetterin kórsetetin qosymsha bilim berý uıymdarynyń qyzmetin retteıtin normalar da kózdelgen, - dedi depýtat.
Budan buryn habarlanǵandaı, búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine qaýipsiz eńbek jaǵdaılaryn jetildirý jáne jumyskerlerdiń eńbek quqyqtaryn qorǵaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.