Arǵyn Nyǵmatýlın 12 jylǵa bas bostandyǵynan aıyrylýy múmkin

ASTANA. KAZINFORM - Prokýratýra organdarynyń bastama jasaýymen Sybaılas jemqorlyqqa qarsy is-qımyl agenttigi izdeý jarııalaǵan Arǵyn Nyǵmatýlınniń ústinen qandaı bap boıynsha is qozǵalǵany málim boldy.

Bul týraly Kazinform QR Bas prokýratýrasynyń baspasóz qyzmetine silteme jasap habarlaıdy.

«QR Bas prokýratýrasy A.Nyǵmatýlınge jáne basqa da kúdikti tulǵalarǵa qatysty Qylmystyq kodekstiń 189-baby (Senip tapsyrylǵan bóten múlikti ıemdenip alý nemese talan-tarajǵa salý) 4-bóligi 2-tarmaǵy boıynsha tergeý júrgizip jatyr», - delingen habarlamada.

Bul bap boıynsha, jeti jyldan on eki jylǵa deıin bas bostandyǵynan aıyrý jazasy qarastyrylǵan.

Buǵan deıin elimizdiń prokýratýra organdary burynǵy Májilis spıkeri Nurlan Nyǵmatýlınniń aǵasy Arǵyn Nyǵmatýlınge izdeý jarııalaǵanyn jazǵan edik.

Keıinirek Arǵyn Nyǵmatýlınge halyqaralyq izdeý jarııalanǵany málim boldy.