«Arǵymaq» keshenindegi balalarǵa arnalǵan ıppoterapııa qyzmeti ózgermeıdi

ASTANA. KAZINFORM — Elorda ákimdigi qalalyq máslıhat depýtattarynyń «Arǵymaq» at sporty keshenindegi balalarǵa arnalǵan ıppoterapııa bolashaǵyna qatysty alańdaýshylyǵyna jaýap berdi. 

Astana qalalyq máslıhatynyń depýtaty Vladıslav Sergeev «Arǵymaq» at sporty keshenin senimgerlik basqarýǵa berý kózdelip otyrǵanyn aıtyp, ıppoterapııa (tirek-qozǵalysynda aqaý bar adamdardy atqa mingizip ońaltý — red.) qyzmetine muqtaj balalardyń bolashaǵyna alańdaıtynyn bildirdi.

— Ókinishke qaraı, bıýdjettiń, halyqtyń aqshasyna salynǵan nysandarymyzdy jeke kompanııalarǵa berýdiń osyndaı mehanızmi bar. Sonda olar bizdiń aqshamyzǵa satyp alynǵan nemese salynǵan ǵımaratty basqarýdan aqsha tabady. Menińshe, bul bıýdjettik sharýashylyqty basqarýdyń, bıýdjetti jumsaýdyń sonshalyq tıimdi tásili emes. Sondyqtan osy jaǵdaıdy taǵy bir taldap shyqsa degen ótinishim bar. Óıtkeni o basta atalǵan nysan erekshe balalarǵa ıppoterapııa qyzmetin kórsetý úshin satyp alynyp jatqany, balalardyń bári aqysyz kire alatyny aıtylǵan. Biraq ádette senimgerlik basqarýshy kelgen soń qyzmettiń kóbin aqyly ete bastaıdy, — dedi Vladıslav Sergeev.

Osyǵan oraı agenttik saýalyna jaýap bergen Astana ákimdigi keshendi tıimdi paıdalaný maqsatynda ony ári qaraı paıdalaný men damytý boıynsha ártúrli nusqalar qarastyrylyp jatqanyn, onyń ishinde senimgerlik basqarýǵa berý múmkindigi de bar ekenin atap ótti.

— Eger senimgerlik basqarýǵa berý týraly sheshim qabyldanatyn bolsa, onda qoldanystaǵy zańnamaǵa sáıkes, nysandy senimgerlik basqarýǵa alatyn qatysýshy tıisti rásimderden keıin anyqtalady. Sonymen qatar, barlyq áleýmettik mindetteme, onyń ishinde ıppoterapııa tolyq kólemde saqtalady, — dep sendiredi ákimdikten.

Vedomstvonyń málimetinshe, jyl basynan beri «Arǵymaq» kesheninde 900-den astam balaǵa ıppoterapııa boıynsha tegin sabaq ótkizilgen. 

Aıta ketelik ıppoterapııa medıtsınalyq ońaltýdyń klınıkalyq hattamasyna engizilmek.