Argentınany álem chempıonatynyń favorıti dep aıta almaımyn — sarapshy
ASTANA. KAZINFORM — Sport sarapshysy Bek Shymat Jibek joly telearnasynyń «Búgin LIVE» baǵdarlamasynda fýtboldan álem chempıonaty jaıly pikir bildirip, týrnırdegi basty favorıtter men kútpegen nátıjelerge toqtaldy.
Onyń aıtýynsha, bıylǵy álem chempıonatynyń basty erekshelikteriniń biri — Ózbekstan quramasynyń álemdik dodaǵa qatysýy.
— Bul Orta Azııa halyqtary úshin erekshe oqıǵa boldy. Ózim de Tashkentke baryp, on kúndeı sonda bolyp keldim. Ózbek jankúıerleriniń álem chempıonatyna shyqqan quramany qalaı qoldap jatqanyn kórdik. Qaladaǵy stadıondar lyq tolyp, matchtar úlken ekrandardan kórsetildi. Halyq bul jetistikti álem chempıonatyn jeńip alǵandaı atap ótip jatyr, — dedi sarapshy.
Bek Shymat ózbek jankúıerleriniń quramasyna qatysty kózqarasyna da nazar aýdardy.
— Qazaqstan álem chempıonatyna shyqsa, jankúıerler jeńilis týraly oılaǵysy da kelmes edi. Al ózbek jankúıerleri jaǵdaıǵa realıstik turǵydan qaraıdy eken. Olar úshin álem chempıonatyna qatysýdyń ózi úlken jetistik, — dedi ol.
Sarapshy álem chempıonattarynyń tarıhyna toqtalyp, eń kóp álemdik dodaǵa qatysqan quramalardyń biri Meksıka ekenin aıtty.
— Meksıka — chempıonat tarıhynda eń kóp oıyn kórsetken qurama. Biraq osy ýaqytqa deıin shırek fınaldan ári asa alǵan joq, — dedi Bek Shymat.
Sonymen qatar ol Marokko quramasynyń qazirgi deńgeıine joǵary baǵa berdi.
— Marokko Brazılııamen de terezesi teń oınaı alatyn komanda ekenin kórsetti. 2022 jylǵy álem chempıonatynda jartylaı fınalǵa shyqqannan keıin de óz deńgeıin saqtap qaldy. Sondyqtan olardy kózge kóp túse bermeıtin, biraq qaýipti ujymdardyń qataryna qosýǵa bolady, — dedi sarapshy.
Bek Shymattyń pikirinshe, qazirgi týrnırdiń basty favorıtteri — Portýgalııa, Frantsııa, Ispanııa jáne Anglııa quramalary.
— Al Argentınany favorıtter qataryna qosa almaımyn. Olar ázirge óz deńgeıindegi qarsylastarmen kezdesken joq. Eger bári jospardaǵydaı órbise, shırek fınalda Portýgalııamen oınaýy múmkin. Argentına men Portýgalııa kezdesse, bul álem chempıonaty tarıhyndaǵy eń kóp kórermen jınaǵan matchtardyń biri bolar edi, — dedi ol.
Sarapshy Ońtústik Afrıka men Ońtústik Koreıa arasyndaǵy matchty týrnırdegi basty sensatsııalardyń biri dep atady.
— Men Azııa quramalary arasyndaǵy basty favorıtterdiń biri retinde Ońtústik Koreıany kórgen edim. Sondyqtan olardyń nátıjesi biraz jankúıer úshin kútpegen jaǵdaı boldy, — dedi Bek Shymat.
Sóz sońynda sarapshy fınalda Portýgalııanyń Frantsııa nemese Ispanııaǵa qarsy oıynyn kórgisi keletinin aıtty.
Aıta keteıik, kúni keshe Shveıtsarııa Kanadany jeńip, álem chempıonatynyń pleı-off kezeńine shyqty.
