Argentınalyq fýtbolshy oıyn kezinde qarsylasyna ıne suǵyp aldy
ASTANA. QazAqparat - Argentınalyq «Pasıfıko» klýbynyń fýtbolshysy Federıko Allende matchtardyń birinde qarsylasyna ıne suqqanyn moıyndady.
Argentınanyń Vorterix radıosyna bergen suhbatynda Allende ótken jeksenbi kúni Argentına kýbogy úshin ótken oıynda «Estýdıantes» klýbynyń oıynshysyna birneshe ret ıne suqqanyn kúle esine aldy.
«Biz olarǵa qarsy dóreki oınaýymyz qajet ekenin bildik jáne men «Estýdıantes» shabýylshysyna áldeneshe ret ıne suǵyp aldym», - dedi Allende. Ol sondaı-aq fýtbol «aqyldylarǵa» arnalǵan oıyn ekendigin aıtty.
Kolýmbııalyq «Estýdıantestiń» shabýylshysy Hýan Otero jergilikti BAQ ókilderine jeksenbilik match kezinde «Pasıfıko» oıynshysynyń oǵan tórt márte ıne suqqanyn málimdegen. Oteronyń aıtýynsha, ol bul jaıly tóreshige de habarlaǵan, alaıda tóreshi onyń aryzyn qabyldamaǵan.
Allende onyń negizgi qarsylasy Otero bolǵandyǵyn moıyndady. «Ol endi meni jek kóretin shyǵar», - deıdi sportshy.
