Argentınalyqtar Haver Mıleıdiń reformalaryna qarsy narazylyq aktsııasyna shyqty

ASTANA. KAZINFORM – On myńdaǵan argentınalyq azamat el prezıdenti Haver Mıleıdiń reformalaryna qarsy narazylyq aktsııasyna shyqty, dep habarlaıdy BBC. 

Eldegi eń iri kásipodaq uıymy CGT 24 qańtarǵa jalpyulttyq ereýil jarııalady. Býenos-Aıres pen basqa da qalalarda halyq kóp jınaldy.

Negizgi mıtıng parlamenttiń janynda ótti, onda saıasatkerler prezıdenttiń ekonomıkany qaıta retteý jáne eldi 200 paıyzdyq ınflıatsııa men 40 paıyzdyq kedeılik deńgeıinen shyǵarý úshin eńbek quqyqtaryn qysqartý josparyn talqylady.

Jeti mıllıon múshesi bar CGT-ge basqa kásipodaqtar men azamattyq qoǵam toptary qosylyp, olar jumysshylardyń quqyqtaryna qatysty «qol jetken nárseniń bir bóligin de bermeýge» ýáde berdi.

«Adamdar narazylyq bildirýde... muny eshkim joqqa shyǵara almaıdy», - dedi CGT basshylarynyń biri Gektor Daer.

12 saǵatqa sozylǵan ereýil qoǵamdyq kólikterge, áýe reısterine jáne basqa da qyzmetterge áser etti. Aerolineas Argentinas 300-ge jýyq reısti toqtatty.

Eldiń Qaýipsizdik mınıstri Patrısııa Býllrıch Mıleı ákimshiligi jeńilmeıtinin aıtyp, X áleýmettik jelisinde ereýilge shyqqandarǵa qaraǵanda kóp adam jumysta bolǵanyn málimdedi.

Oppozıtsııalyq partııalar men kásipodaqtardyń málimdeýinshe, usynylǵan qaıta retteý jáne memlekettik shyǵyndardy qysqartý halyqtyń eń osal toptaryna áser etip, kedeıshilikti arttyrady.

Mıleı 45 kún buryn saılandy, ol qaıta retteý júrgizýdi, shyǵyndardy aıtarlyqtaı qysqartýdy jáne peso devalvatsııasyn júrgizýdi ýáde berdi.
Onyń synaq merzimin úsh aıdan segiz aıǵa deıin ulǵaıtý, jumystan shyǵarylǵan jaǵdaıda ótemaqy mólsherin azaıtý jáne júktilikke baılanysty demalysty qysqartý áreketin sot el kongresinde qaraýǵa deıin toqtatyp qoıǵan.