Argentınalyq oqýshylar Qazaqstandy Dımash arqyly tanydy
ASTANA. KAZINFORM — Argentınanyń Eseısa qalasynda júzege asyrylǵan erekshe bilim berý jobasy aıasynda mektep oqýshylary Qazaqstannyń mádenıetimen tanysyp, óz eliniń tarıhyn zerdelep, jeke jáne ulttyq biregeılik máselelerin jan-jaqty qarastyrdy. Bul týraly Dimashnews saıty jazdy.
Jobanyń avtory — Paola Romına Profeta esimdi oqytýshy boldy. № 13 mekteptiń oqýshylary bir oqý jyly boıyna «Esimder men biregeılik: Qazaqstanmen tanysýdan óz ómirlik jolyńdy tańdaýǵa deıin» atty zertteý-bilim berý jobasyn júzege asyrdy.
Joba «Qazaqstan» ataýynyń maǵynasyn ashýmen bastaý aldy. El ataýynyń shyǵý tórkinin, Qazaqstannyń tarıhyn, dástúrlerin, mýzykalyq murasy men mádenı qundylyqtaryn zertteý barysynda oqýshylar birtindep ózderiniń ulttyq biregeıligin zerdeleýge kóship, «Argentınalyq bolý neni bildiredi?» degen máselege jaýap izdedi.
Joba barysynda Qazaqstan men Argentına arasyndaǵy uqsastyqtarǵa erekshe nazar aýdaryldy. Oqýshylar Sharyn shatqaly men Kebrada-de-las-Konchas, Qaıyńdy kóli men Vılıa-Trafýl, sondaı-aq Torysh ańǵary men argentınalyq Aıly ańǵar tabıǵı nysandarynyń erekshelikterin salystyrmaly turǵydan taldady.
Jobanyń mańyzdy bólimderiniń biri Qazaqstannyń halyq ártisi Dımash Qudaıbergenniń shyǵarmashylyǵyn zertteýge arnaldy. Oqýshylar ánshiniń «Love’s Not Over Yet» beınebaıanyn kórip, onyń kórkemdik mazmuny men ıdeıalyq qurylymyna taldaý jasady. Sonymen qatar olar týyndynyń yqtımal jalǵasyn óz kózqarastary negizinde usynyp, ártiske hat jazyp, ony Argentınaǵa kelýge shaqyrdy.
Jobany uıymdastyrýshylardyń pikirinshe, Dımash Qudaıbergen oqýshylar úshin tabıǵı daryny, qajyrly eńbegi men óz ultynyń qundylyqtaryna degen qurmeti arqyly halyqaralyq deńgeıde tanylǵan tulǵanyń jarqyn úlgisi boldy.
Kelesi kezeńde oqýshylar óz esimderiniń shyǵý tarıhyn zerttep, olardyń qoıylý sebepterin anyqtady. Sonymen qatar, oqýshylar «Men kimmin?» jáne «Men qandaı adam bolǵym keledi?» degen irgeli suraqtarǵa jaýap izdeýge tyrysty.
Jobanyń qorytyndy nátıjesi ǵylymı jármeńke barysynda kópshilikke usynyldy. Kórmede Qazaqstan men Argentınaǵa arnalǵan ekspozıtsııalar, eki eldiń tabıǵı jáne mádenı erekshelikterin salystyrmaly túrde sıpattaıtyn materıaldar, sondaı-aq oqýshylardyń ómirlik maqsattary, qundylyqtary men armandary týraly zertteý nátıjeleri tanystyryldy.
Aıta keteıik, buǵan deıin Meksıkada Dımash Qudaıbergenniń áýe sharlarynan 4,5 metrlik músini jasaldy.
